The Definitive Guide to Living in the Capital , Cairo , Egypt

الحقيقة أننا أصبحنا مش عارفين بالضبط هل إحنا اللى أصبحنا أكثر مللاً أو أكثر خبرة فى توقع تيمات الأفلام اللى بـ يتم عرضها مؤخرًا؟ أم أن المنتجين والمخرجين ما أصبحش عندهم الصبر الكافى لتقديم أعمال تحترم عقلية المشاهد؟ أم أن هدف الربح السريع ممكن يتغلب على إحساس الرضا اللى بـ ييجي لهم من تقديم أفكار جديدة؟ على أى حال مهما تعددت الأسئلة بـ يظل إحساسنا أن فيلم The Pirate Fairy منقول بشكل أو بآخر من عدة تيمات أخرى.

من تأليف وإخراج ييجي هولمز بـ نشوف كارلوس بونسى ولوسى لو وكريستينا هندريك وغيرهم من الفنانين من خلال الأداء الصوتى للشخصيات الرئيسية للفيلم اللى بـ يحكى عن مغامرة سحرية للبحث عن غبار أزرق سحرى، لو شغلنا ذاكرتنا شوية هـ نلاقى أن القصة متشابهة مع قصة ثانية هى “البحث عن نيمو” وهو واحد من أشهر أفلام الأنيميشن، برضه الرحلة العجيبة والسحرية اللى بـ يكون الهدف منها البحث عن شىء قيم (سواء كان غبار سحرى أو ابن أحد الأسماك أو حتى البحث عن فصيلة نادرة من الطيور زى ما شوفنا فى فيلم Rio 2).

يمكن سبب شعورنا بالملل هو الإصرار على تقديم نفس التيمة من الأفلام، لكن ما نقدرش ننكر أنه تم تقديم الفيلم بشكل جديد ومبهر، وخصوصًا على مستوى الموسيقى التصويرية والمؤثرات البصرية.

أسلوب تحريك الشخصيات على الشاشة كان انسيابى وسريع وبشكل مريح للعين، كمان الموسيقى التصويرية ساعدت على اندماجنا فى العمل من البداية للنهاية، كمان أداء الممثلين الأساسيين لأصوات الشخصيات أعطانا إحساس أعلى بالاندماج مع الشخصيات وسيناريو الفيلم، ولعل وعسى الشىء الوحيد اللى ضايقنا هو إحساسنا بتكرار قصة الفيلم وتشابهه مع كثير من الأعمال الأخرى اللى شوفناها مؤخرًا.

The Pirate Fairy فيلم مناسب للمشاهدة لو كنت مش بـ تزهق من أفلام الأنيميشن مهما حسيت أن الفكرة ممكن تكون مكررة، أو لو كنت من المشاهدين اللى بـ يهتموا بالإبهار وتقنيات العرض على حساب أى شىء آخر.