The Definitive Guide to Living in the Capital , Cairo , Egypt

فكرة اليوم المفتوح للجريمة، واللى بـ تعتمد على الفكرة الخيالية لوجود يوم واحد بـ يتم ارتكاب أى جرائم من أى نوع به دون أى عقاب أو حساب، فكرة سبق تقديمها فى فيلمThe Purge ، وواضح أن النجاح اللى حققه الفيلم شجع صناعه على إنتاج جزء ثاني له، ومن وجهه نظرنا، ورغم رفضنا للأجزاء الثانية من الأفلام بشكل عام، إلا أن فكرة الفيلم كانت تستحق تقديمه فى عمل جديد وجزء جديد.

من إخراج وتأليف جيمس ديموناكو بـ نشوف فرانك جريلو، كارمن أيجوجو وزاك جيلفورد فى فيلم أكشن معتمد على فكرة اليوم المفتوح للجريمة بدون عقاب، نقدر نصنف الفيلم على أنه فيلم أكشن، لكننا أكثر ميلاً لتصنيفه كفيلم رعب نفسى قائم على فكرة السؤال اللى بـ يطرحه المشاهد على نفسه: لو أنا موجود مكان البطل فى اليوم ده هـ اتصرف إزاى؟! وهل هـ أكون الجاني أم المجني عليه؟ ودي فكرة جديدة فى الرعب، المجال اللى ما كانش عندنا توقع أن تظهر فيه أفكار جديدة قريبًا.

على الرغم من جودة فكرة الفيلم، إلا أن الأداء التمثيلى للأبطال لم يكن بالقوة اللى كنا متخيلينها، يمكن لأننا بـ نشوف أن تمثيل الفزع والخوف على مدار أحداث الفيلم مش بالضرورة يخرج من ممثلين محترفين، وأن الأدوات التمثيلية لأي فنان فيها أكثر من مجرد التظاهر بالخوف طوال الوقت، لكن بالنسبة لفيلم رعب بـ يحاول يوصل المشاهدين لأقصى قمة التعاطف مع الأبطال والإحساس بورطتهم ومن ثم قياسها على أنفسهم، نقدر نقول أن تمثيل الأبطال فى المنطقة دى كان مقبول.

الموسيقى التصويرية كانت متوافقة مع الأحداث العامة للفيلم، قدرت تتصاعد مع لحظات الخطر وتكون أهدأ شوية مع اللحظات اللى مافيهاش أكشن، وده شىء يحسب لها، وبشكل عام الموسيقى التصويرية مش بـ تكون أول شىء بـ تقع عليه عيوننا عند تقييم أفلام الرعب، وبـ تقل أهميتها مع بعض العناصر الأخرى زى الإضاءة مثلاً اللى كانت غير متوازنة وحسينا أننا كنا محتاجين نشوف مشاهد أكثر فى إضاءة أفضل، لكن دايمًا الإضاءة الخافتة من العناصر المتعارف عليها فى أفلام الرعب.

بالتأكيد The Purge: Anarchy مش أفضل فيلم رعب شوفناه فى حياتنا، لكنه استمرار مقبول لسلسلة لو اهتم صناعها بالعمل عليها أكتر من كده، وحاولوا يطوروا فى فكرتها الأساسية بشكل أكثر رعبًا وانسجامًا مع نفسية المُشاهد، ممكن يخرج منها أفلام أقوى وأفضل.