The Definitive Guide to Living in the Capital , Cairo , Egypt

The Runner

The Runner: فيلم ضعيف من نيكولاس كيدج

  • بيتر فونداسارة بولسون...
  • دراما
  • أوستين ستاركأوستين ستارك
  • في1 Cinema
تم التقييم بواسطة
Mohamed Hamdy
قيم
قيم الآن
The Runner: فيلم ضعيف من نيكولاس كيدج

في واقع الأمر ممكن نقول أن فيلم The Runner كان المفروض يكون فيلم متميز، لولا أمرين مهمين: الأول حالة الملل وعدم وجود أحداث حقيقية فيه، والثاني هي قيام نيكولاس كيدج ببطولته.. وإحنا آسفين أننا بـ نقول كده عن "كيدج" لكنه أخذ أكثر من حقه وأعطيناه الفرصة تلو الأخرى علشان يرجع عن المسار الفني الغريب اللى قرر أنه يمشي فيه.. لكن واضح أن القصة انتهيت بالنسبة له خلاص!

من تأليف وإخراج أوستن ستارك بـ نشوف نيكولاس كيدج في دور محامي بـ يتولى مهمة الدفاع عن مجموعة من الصيادين المتضررين من حادث تسرب بترولي في نيو أورليانز.. كل الأمور بـ تمشي بشكل كويس جدًا مع (كولين) إلى أن يتم تسريب خبر وفيديو لفضيحة جنسية بينه وبين زوجة أحد الصيادين اللى بـ يتولى الدفاع عنهم.. الأمر اللى بـ يهز حياته العملية والشخصية بشكل ضخم وبـ يهدد ترشحه لمجلس الشيوخ بالإضافة لتهديدها لعلاقته بزوجته، وبـ تدفعه ناحية هوة عميقة من إدمان الكحول والدخول في علاقات نسائية ثانية.

على الرغم من قصة الفيلم اللى ممكن تكون قوية، إلا أن تحويلها لسيناريو فيلم حول القصة لفيلم بطئ الأحداث كئيب المشاهد، وكأن السيناريو بـ يدفعنا نحو نقطة بعينها، ولما وصلنا لها اكتشفنا أنها ما كانتش تستحق كل العناء ده، الأمر اللى أصابنا بالإحباط وإحساسنا أن مشاهدتنا للفيلم كانت بلا جدوى!

الفيلم بـ يدق ناقوس خطر مهم جدًا وهو خطر الإدمان.. بـ نشوف إزاي حياة كولين بـ تتهدد بالانهيار -أو بـ تنهار فعليًا- نتيجة عدم قدرته على السيطرة على هوسه الجنسي، وفيما بعد هوسه بالكحول، الأمر اللى بـ نعرف أنه متأصل في عائلته كون والده مدمن كحول برضه.. الفيلم كمان بـ يعرفنا أن الإدمان مش لازم يكون كحول أو مخدرات وبس.. وأن أي شىء بـ يخرج عن السيطرة وبـ يدمر حياة صاحبه ويتحكم فيه يعتبر إدمان.

على الرغم من بساطة الديكورات وقدرتها على التأثير فينا وعكس الجو العام للفيلم، إلا أن الموسيقى التصويرية ما كانتش بنفس القوة، وللأسف حتى لو كانت الديكورات والموسيقى على أعلى مستوى، إحساسنا العام بالفيلم كان هـ يكون سىء نتيجة البطء الشديد والمط في الأحداث وعدم تقديم أي جديد على مدار زمن الفيلم، إلا أن ملامح نيكولاس كيدج المرهقة والحزينة قدرت تعكس مشاعره، لكن إحنا عارفين أن ملامح كيدج في الفترة الأخيرة فعلًا متغيرة وانفعالاته مرهقة وده تكرر في أكثر من فيلم.

The Runner فيلم كان المفروض يبقى كويس.. لكن عوامل كثير أدت لعكس ده.. للأسف.

عجبك ؟ جرب

The Judge.

نصيحة 360

نيكولاس كيدج من أصل إيطالي مواليد 1964 وفاز بأوسكار أفضل ممثل عن دوره في فيلم Leaving Las Vegas.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح