The Definitive Guide to Living in the Capital , Cairo , Egypt

مجموعة من رجال الشرطة الأقوياء اللي بيتمتعوا بخفة الدم وروح المرح، وفي نفس الوقت محترفين وقادرين على توجيه الضربات لأعدائهم بقوة.. النمط ده من الأفلام مش جديد علينا، وشوفناه كتير في أفلام متوسطة التكلفة الإنتاجية من هوليوود، والحقيقة أن النمط ده من الشخصيات والأفلام اللي بتتناولها قد يكون محبب عندنا شوية بسبب أنه بيفكرنا بأفلام الكاوبوي الأمريكية، واللي كان البطل فيها بيتمتع بنفس الصفات تقريبًا.

فى فيلم The Squad اللي أخرجه بنجامين روشيه وكتب قصته تريستان شولمان، بنشوف النجوم جون رينو، وسابرينا ويازانا، وعمرو دياو، وكاترينا مورينو، في قصة فرنسية الطابع والطعم واللون، عن فريق خاص من رجال الشرطة اللي بيتتبعوا عصابة محترفة متخصصة في السطو على البنوك، وفي سبيل الوصول للعصابة بيبدأوا يكتشفوا أن الموضوع متطلب أكتر من خفة الظل اللي بيتمتعوا بيها، وأن للقصة أبعاد تانية أكثر أهمية وقوة.

على الرغم من أننا قولنا أن النمط ده من الأفلام بيعجبنا، إلا أن خلطة الكاوبوي على الطريقة الفرنسية أثبتت فشلها للأسف، بداية من الأداء التمثيلي الضعيف والمعتمد على الإيفيهات وإظهار استهتار أعضاء الفريق أكثر من الازم، وغيرها من المشكلات الإخراجية اللي كانت بتبقى أكثر وضوحًا مشهد بعد مشهد، أما القشة اللي قسمت ظهر البعير بالنسبة لنا كانت إخراج مشاهد الأكشن واللي كان واضح فيها جدًا أن الممثلين خايفين يلمسوا بعض! والإخراج مش عارف يداري على النقطة دي فأصبحت مشاهد الأكشن في النهاية هزلية جدًا وضعيفة ومبتذلة إلى أبعد الحدود.

على الرغم من تصوير الفيلم في فرنسا إلا أن استخدام البيئة الفرنسية والديكورات الفرنسية المشهورة من معالم سياحية وخلافه كان ضعيف جدًا وغير مؤثر في سياق الأحداث، ولو اتقال لنا أن الفيلم بتدور أحداثه في ألمانيا أو النمسا ماكناش هنلاحظ الفرق! لكن الموسيقى التصويرية كان لها طابع فرنسي شيق في بعض المشاهد، وقدرت توصل لنا الإحساس بالترقب والأكشن واللي فشلت فيه مشاهد الأكشن نفسها!

فيلم The Squad في رأينا فيلم بيتسد بيه الساحة السينمائية في مصر كفيلم رخيص التكلفة، استعدادًا لإغلاق السينمات في رمضان.. إحنا كمان بنستعد لموسم رمضاني مسلسلاتي ساخن.. إبقوا بصوا على الهاشتاج #وحوي_يا_كايرو تجدوا ما يسركم.