The Definitive Guide to Living in the Capital , Cairo , Egypt

كان بقى لنا فترة طويلة ما شوفناش فيلم فيه القدر ده من الكوميديا الجميلة والمختلفة، كان بقى لنا كثير ما شوفناش فيلم بـ يسخر من الرحلات والأجازات وتقاليد لم شمل العائلة الأمريكية المفككة، Vacation مش أحسن فيلم في التصنيف الكوميدي، لكنه فيلم جاء على شوقة زي ما بـ نقول في الأمثال العامية، وده في حد ذاته يتطلب الاحتفال!

من إخراج وتأليف جون فرانسيس دالي بـ نشوف محاولة الأب إيد هيلمز أو راستي أنه يعيد شمل عائلته من جديد، في مكان جديد وبأسلوب جديد، بعد ما بـ يسمع مراته ديبي بـ تتكلم مع أصحابها عن مدى ضيقتها من تقضيتهم نفس الأجازة كل سنة في نفس المكان وبنفس الأسلوب.

راستي بـ يكتشف مع مطالعته للصور أنه بالفعل بـ يقضي كل سنة نفس الأجازة في كوخ كئيب، الأمر اللي بـ يخليه يعمل مفاجأة لمراته وأولاده ويقرر أنه يأخدهم لمكان جديد، مش جديد قوي يعني، المكان الجديد هو وايلي وورلد، المكان العظيم اللى.. مش عاوزين نقول أكثر من كده علشان ده في صلب أحداث الفيلم اللي بـ يحكي عن المواقف الكوميدية اللي بـ يتعرض لها راستي مع زوجته وأولاده في سبيل الوصول لهناك.

المقارنة بين التريلر وبين اللى شوفناه على الشاشة بـ تعرفنا أن فيه كثير من القطع الرقابي اللى تم، ومش عارفين إزاي ممكن الرقابة تسمح بعرض تريلر فيه مشهد معين وبعدين تمسح المشهد من الفيلم نفسه! ما هو يا نعرض التريلر والفيلم يا نمسح المشهد من التريلر والفيلم!

الموسيقى التصويرية كانت أكثر من رائعة، وخصوصًا الأغاني اللي تم استعمالها في أحداث الفيلم واللي إحنا مصممين على متابعة تنزيل الموسيقى التصويرية علشان نسمع أغاني الفيلم أكثر ونعرف أكثر عن الموسيقى الحماسية الجميلة اللي سمعناها خلال الأحداث.

مشاهد مطاردة سيارة النقل للعائلة فكرتنا بأفلام ثانية بـ يتم فيها نفس المطاردة من نفس النوع، لكن في Vacation تم تقديمها بشكل كوميدي وجميل ومختلف فعلًا عن باقي الأفلام اللي حصرت تقديمها على الرعب والإثارة والأكشن فقط.

Vacation فيلم كوميدي متميز، ننصحكم بمشاهدته لو عاوزين تفكوا دماغكم شوية من هموم الحياة اليومية.