The Definitive Guide to Living in the Capital , Cairo , Egypt

بسهولة شديدة كان المفروض أن الفيلم يأخذ 4 نجوم من 5 فى تقييمنا، السبب أننا متعطشين لفيلم كوميدي ينسينا مشاكل الحياة اليومية السياسية والاجتماعية، إلا أن الأسلوب الفج فى تقديم الكوميديا، وعدم مناسبة الفيلم لكل الأعمار خلتنا نتراجع ونعطيه 3 نجوم فقط.

على مدار حوالى ساعتين بـ نشوف كوميديا أصيلة من إخراج روسن مارشال ومن بطولة جيسون سوديكيس وجنيفر أنيستون، ويل بولتر والحسناء الشابة إيما روبرتس، واللى تبقى قريبة جوليا روبرتس بالمناسبة.

الفيلم بـ يحكى عن تاجر مخدرات صغير بـ يقع فى ورطة بـ تضطره للتورط فى عملية تهريب مخدرات من المكسيك إلى الولايات المتحدة، وعلشان ما يلفتش أنظار ضباط الحدود بـ يقرر استئجار أسرة وهمية علشان ما حدش يشك فيه، الممتع أنه بـ يكتشف أن الخطر الحقيقى مش فى ضباط الحدود على الإطلاق، لكن فى الرحلة نفسها، ومش هـ نتكلم أكثر من كده علشان ما نحرقش عليكم الأحداث الممتعة.

نقطة الضعف الوحيدة فى الفيلم هى أنه مليء بمشاهد الشتيمة، وإشارات بذيئة بالأصابع، ناهيك عن الوصف التفصيلى لعلاقات جنسية أو أعضاء خاصة فى جسم الإنسان، وغيرها من الأمور اللى تخلى الفيلم مش عائلي زى ما كنا متوقعين على الإطلاق.

لاحظنا الهوس الشديد من صناع الفيلم بمنتجات شركة آبل العالمية فى مجال الاتصالات والتكنولوجيا، تقريبًا كل أبطال الفيلم معاهم آي فون، ورغم محاولات بعضهم فى بعض المشاهد مداراة تفاحة آبل الشهيرة إلا أنه كان من الواضح تمامًا استعمالهم لمنتجات الشركة، ناهيك عن المشهد الأخير فى الفيلم لما بـ تظهر جنيفر أنستون وهى بـ تستعمل لابتوب ماك، تكلمنا بالتفصيل عن آبل والتكنوجيا فى نقدنا لفيلم Jobs بالتالى مش عاوزين نكرر كلامنا هنا، لكنها كانت لفتة جميلة من المخرج.

ديكورات مكتب تاجر المخدرات، وسيارة الرحلات اللى انتقلت فيها العائلة كانت أكثر من رائعة، حسينا بالفخامة فى مكتب تاجر المخدرات، وحسينا بالدفء والحميمية فى السيارة، لكن الموسيقى التصويرية ما سابتش أى أثر يذكر عندنا، اللهم إلا من مشهد ويل بولتر وهو بـ يغنى أحد الأغاني بنفسه.

We’re the Millers فيلم يستحق المشاهدة لو كنت لوحدك أو أفراد أسرتك أكبر من 18 سنة ومتعودين على الجرعة دى من الجرأة.. غير كده ما ننصحكش.