The Definitive Guide to Living in the Capital , Cairo , Egypt

أفلام
xXx: Return of Xander Cage

xXx: The Return of Xander Cage :كله ضرب ضرب.. مافيش شتيمة؟!

  • دوني يينروبي روز...
  • حركة ومغامرات
  • دي جي كاروسو
  • في1 Cinema
تم التقييم بواسطة
Mohamed Hamdy
تقييمك
قيم الآن
xXx: The Return of Xander Cage  :كله ضرب ضرب.. مافيش شتيمة؟!

لما تكون شاطر في تقديم توليفة سينمائية ما، هوليوود بتقول لك استمر في تقديمها مرات ومرات ومرات، وفي كل مرة هيكون النجاح حليفك علشان طوال الوقت الجمهور بيحب يتفرج علي أجزاء جديدة من أعمال سابقة، وكلها بتحمل تقريبًا نفس الحبكة. وفيلم xXx: The Return of Xander Cage يعتبر من أكثر الأمثلة اللي بتعبر عن النظرية دي.

نقدر نقول بضمير مستريح أن 100% من أحداث الفيلم متوقعة بالكامل، لكن المتعة مش في اكتشاف أحداث جديدة، بقدر ما بتكون فى الإستمتاع بجرعة من الأكشن ومشاهد المطاردات وتبادل إطلاق النار، وغيرها من الحاجات اللي متعودين عليها في النوعية دي من الأفلام.

 

لو ماكونتش شوفت الأجزاء السابقة من سلسلة xXx هتقدر تتابع فيلم اليوم بسهولة، لكن بننصحك بمتابعة السلسلة علشان تزود متعتك للنهاية، ولازم هنا نقول أن صناع الفيلم قدروا يوازنوا بين إمتاع المتابعين القدامى للسلسلة وبين المتابعين الجدد، اللي نعتقد أن كثير منهم ممكن يدور على الأجزاء السابقة ويبدأ في مشاهدتها.

فيلم xXx: The Return of Xander Cage من تأليف إف. سكوت فريزر وإخراج دى.جي كاروسو وبيشارك فان ديزل البطولة كونر مكروجر وروبي روز مع توني جا وصامويل جاكسون.

الفيلم بيحكي عن العميل السري إكساندر كايج واللي بيرجع تاني لساحة العمل السري علشان يكتشف سر سرقة جهاز غامض إسمه (صندوق باندورا)، والقادر على التحكم في الأقمار الصناعية في العالم وتوجيهها كأسلحة قاتلة ضد أفراد أو منشأت عامة وخاصة، الأمر اللي بيضع الإدارة الأمريكية أمام تحدي صعب، وبيكون أمام (كايج) حل واحد هو تكوين فريق من أفضل المقاتلين لاستعادة (صندوق باندورا).

معلومة على الطاير: الجهاز المدمر في الفيلم واللي أطلق عليه اسم (صندوق باندورا) نسبة لأسطورة يونانية قديمة عن صندوق بيحتوي كل الشرور البشرية زي الجشع والطمع والغيرة والحقد.. وغيرها.

طبعًا وزي ما أحنا عارفين، الخيط الدرامي الواهي بيكون مجرد مدخل لتقديم جرعة مكثفة من مشاهد الأكشن  والمطاردات وحتى الاشتباكات بالأيدي وتبادل قذف القنابل اليدوية في مشهد مميز، لكن أفضل مشاهد الفيلم في رأينا كانت مشهد المطاردة بالقوارب البحرية واللي كان مميز بدرجة كبيرة.

الكفاءة الجسدية العالية لفان ديزل كانت واضحه خلال أحداث الفيلم، وتم الأعتماد على شهرته الواسعة في النوعية دي من الأفلام علشان يحقق الفيلم نجاحه، بالأضافة لاعتماده على سلسلة قوية بينتمي لها، لكن في رأينا الفيلم كان أضعف حلقات السلسلة على صعيد التمثيل أو حتي الحوار.

بما أننا بنتكلم عن الحوار.. الحوار كان فيه كثير من الجمل الأعتراضية الساخرة، واللي في رأينا مش بتعجب غير جمهور المراهقين المتابعين للسلسلة واللي عاوزين يشوفوا بطل أمريكي خفيف الظل بيضرب الأشرار وبيسخر منهم! ودى من الأمور اللي عابت الفيلم في رأينا.

xxx2

مين ممكن يعجبه الجزء الأحدث من سلسلة xXx ؟ المشاهدين من سن 12 إلى 20، وعشاق فان ديزل، ومحبي أفلام الأكشن اللي كلها ضرب وخناق وتبادل أطلاق نار بدون استراحة إلا فيما ندر.. وطبعًا متابعي ومحبي السلسلة من البداية هيعجبهم الفيلم.

علشان تبقي عارف:

  • الفيلم بيتعرض فى أكثر من 3500 شاشة سينما حول العالم!
  • ميزانية الفيلم 85 مليون دولار، وخلال الأيام الأولى من عرضه حقق حوالي 70 مليون دولار!
  • تم طرح الفيلم في مصر قبل يومين من طرحه في الولايات المتحدة!

عجبك ؟ جرب

باقي أجزاء السلسلة أو سلاسل مشابهة زي سلسلة أفلام The Terminator أو The Expendables

نصيحة 360

الفيلم بيمثل العودة الثانية لفان ديزل، بعد غيابه عن السلسلة في الجزء الثاني، ديزل أيضًا شارك في إنتاج الفيلم.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح