The Definitive Guide to Living in the Capital , Cairo , Egypt

الـ Menu اليومي لفعاليات القاهرة اللي اتعودنا ننزل لكم بيه كل يوم علشان نحط قدامكم اختيارات متعددة للخروجات وتقضية الوقت، النهارده الأصناف فيه محدودة شوية لكن قيمتها النوعية كبيرة جدًا، وده الأهم!

الصنف الأول هو صنف عالي الجودة لأبعد الحدود، الفنانة اللبنانية "تانيا صالح" هتقف على مسرح الجنينة بحديقة الأزهر الساعة 8:00 مساءً علشان تطربنا بصوتها الرائع وحضورها المميز وطلتها البهية وأغانيها اللي شايلة آمال التاريخ ومراعية واقعية العصر، سعر تذكرة الحضور 30 جنيه غير شاملة تذكرة دخول الحديقة.

أما ثاني الأصناف على القائمة فهيكون من وسط البلد، تحديدًا من سينما "زاوية" اللي هتبدأ من النهارده إعادة عروض الأسبوع الماضي بعد نجاحها الشديد، عرض النهاردة هيكون للفيلم الفلسطيني "عن الحب والسرقة ومشاكل أخرى" في تمام السابعة والنصف مساءً.

ثالث الأصناف هيكون من وسط البلد برضه لكن من مسرح الروابط، اللي هيستضيف النهارده لليوم الثاني على التوالي العرض المسرحي "هبط الملاك في بابل"، سعر تذكرة حضوره 15 جنيه، والعرض هيتقدم مرتين: الأولى في تمام السادسة مساءً، والثانية في تمام الساعة الثامنة مساءً.

في حين هيستمر معانا ضيف قديم على قائمة فعالياتنا وهو معرض كتاب مركز الربع الثقافي اللي مستمر ليومه الرابع تواليًا، المعرض بيفتح أبوابه في تمام العاشرة صباحًا وبيستمر لحد العاشرة مساءً، وأسعار الكتب فيه بتتراوح ما بين جنيه واحد إلى 20 جنيه للكتاب.