The Definitive Guide to Living in the Capital , Cairo , Egypt

الحياة في كايرو

النهارده في القاهرة: حفلات موسيقى وشعر وعروض أفلام ومسرح

النهارده في القاهرة: حفلات موسيقى وشعر وعروض أفلام ومسرح
    بواسطة
    Cairo 360

    بداية أسبوع جديد، وفعاليات القاهرة بتجدد معانا الوعد بالبهجة، ناخد جولتنا، ونقولكم على المفيد، يللا بينا.

    البداية هتكون من مركز الربع الثقافي اللي بيختتم مهرجانه الأول للموسيقى الـ "Acoustic" مع فرقة "Awtar Quartet" اللي بتقدم معزوفات من الكلاسيكيات العالمية، سعر تذكرة الحضور 25 جنيه، والبداية هتكون في تمام السابعة مساءً.

    ومن ساقية الصاوي في الزمالك هنكون على معاد مع الشاعر الشاب سالم الشهباني في حفله الشعري الأول، الحفل هيبدأ في تمام الثامنة مساءً على مسرح قاعة الحكمة بحضور العديد من ضيوف الشرف على رأسهم الفنان الكبير علي الحجار.

    ومن الزمالك برضه هنكون على الموعد الأسبوعي لعروض أفلام المعهد الهولندي، اللي هيعرض لنا النوبة دي الفيلم المصري "ديكور"، العرض كالعادة هيبدأ في السابعة والنصف مساءً والدخول ابتداءً من السابعة، والدعوة عامة والحضور مجاني.

    بقية فعاليات اليوم هتكون كلها من نصيب العروض المسرحية ابتداءً من عرض "الخلطة السحرية للسعادة" على مسرح الهناجر بدار الأوبرا المصرية في تمام الثامنة مساءً بسعر تذكرة حضور 20 جنيه و 10 جنيهات للطلبة، مرورًا بعرض "الحضيض" اللي بيقدمه فريق مسرح كلية الهندسة بجامعة القاهرة على مسرح الغد بالعجوزة في تمام الثامنة مساءً، وانتهاءً بعرض "45" في "دوّار" بشارع عدلي في وسط البلد اللي هيبدأ في تمام الثامنة مساءً أيضًا ودعوة الحضور عامة وبدون تذاكر لكن بحجز مسبق عن طريق رقم تليفون المكان ٠١١١٧٩١١١٣٣ لضمان وجود مكان.

    يومكم سعيد.

    مقترح