The Definitive Guide to Living in the Capital , Cairo , Egypt

يا جماعة قلنا والله أننا ظالمين يوم الثلاثاء معانا.. بصة سريعة على أحداث اليوم النهارده هتعرفنا قد إيه الكلام ده حقيقي، ماهو مايبقاش الراجل مقدم لنا اختيارات واسعة وقوية بالشكل ده وفي الآخر ينوبه مننا العيب!

ركن العروض المسرحية النهارده مقدم لنا تشكيلة لطيفة من 3 عروض كل عرض فيهم ليه لون وشكل وطعم مختلف، عرض "دقة بدقة" على مسرح الفلكي بحرم الجامعة الأمريكية في التحرير هو عرض بطعم كلاسيكي عالمي، وده لأنه مأخوذ عن نص مسرحي لـ "ويليام شكسبير"، العرض هيبدأ الساعة 8:00 مساءً وسعر تذكرة الحضور 40 جنيه.. والعرض الثاني هيكون عرض شبابي خفيف، مسرحية "البروفة" اللي بيقدمها نجوم الفرقة الشبابية ذات الصيت الطيب "1980 و أنت طالع" اللي هتبدأ الساعة 5:00 على مسرح الهوسابير، وسعر تذكرة حضورها 25 جنيه.. أما ثالث العروض فهيكون عرض تقيل بالأسماء المشاركة فيه وبطبيعته وبالمكان اللي هيقام فيه، عرض "ليلة من ألف ليلة" للفنان الكبير يحيى الفخراني على المسرح القومي بالعتبة، العرض هيبدأ الساعة 9:30 مساءً وسعر تذكرة حضوره بيبدأ من 30 جنيه، لحد 100 جنيه.

أما عن ركن الفن الغنائي والموسيقي فالبداية هتكون من وسط البلد بحفل غناء مواويل بلدية في "مكان"، الحفل يحمل اسم "مواويل جمالات ورضا شيحة"، هيبدأ الساعة 8:00 مساءً وسعر تذكرة حضوره 30 جنيه.
ومن نفس الركن هنروح للقلعة اللي لسه فعاليات مهرجانها للموسيقى والغناء شغال، وهيقدم لنا النهاردة وجبة لطيفة على حفلتين، الأولى للفنان فتحي سلامة مع فرقة "سداسي شرارة" الساعة 8:00 مساءً، والثانية للفنانة "مروة ناجي" الساعة 10:00 مساءً، وسعر تذاكر حضور الحفلات 5 جنيهات.

ومن الركن الثقافي هنلاقي نفسنا على موعد مع الراحل العظيم "نجيب محفوظ" في أمسية هيتم تناول فيها حياته وأبرز أعماله بمناسبة الذكرى العاشرة لرحيله، الفعالية بينظمها المجلس الأعلى للثقافة في ساحة دار الأوبرا بالجزيرة والدعوة عامة، والبداية هتكون الساعة 6:00 مساءً.

ونختم مع ركن رابع نقدر نسميه ركن المنوعات، من روم آرت سبيس في الزمالك اللي هتستضيف النهاردة عرض لمجموعة أفلام سورية قصيرة مختارة، البداية هتكون الساعة 8:00 مساءً، ومافيش تذاكر حضور، لكن في حد أدنى للطلب من قائمة بوفيه "روم" 25 جنيه.