النهارده في القاهرة: حفل ختام مهرجان الجيزويت وعروض مسرحية وموسيقية
Cairo 360
وسط زحمة الطرق اليومين دول بسبب المدارس والجامعات بيكون قرار أنك تروح بدري ده قرار متعب جدًا، لأنه معناه أنك هتقف شوية حلوين في الشارع ولو قررت تركب مواصلات كمان هتزعل!
بس هو السؤال دايمًا، طب وهقعد في الشارع أعمل إيه؟ .. إحنا نقولك، نشوف لك خروجة كويسة تقضي بيها الوقت، وآهو يبقى منها تفادي لوقت الذروة في الزحمة، وفي نفس الوقت آديك بتنبسط.
النهارده في القاهرة نضمن لك الانبساط لو قررت تحضر حفل ختام الدورة الثالثة لمهرجان الجيزويت للفيلم في جيزويت القاهرة، الحفل هتحييه فرقة "هوس" الموسيقية، والبداية هتكون في تمام السابعة مساءً، والدعوة عامة والحضور مجاني.
ومش هنروح بعيد أوي، يادوب محطة بس ونوصل لمسرح الهوسابير، ونضمن لك جرعة انبساط أخرى مع مسرحية "البروفة" اللي بيقدمها الفريق المسرحي الشبابي صاحب العرض الشهير "1980 وأنت طالع"، سعر تذكرة الحضور 25 جنيهًا، والبداية هتكون في تمام الثامنة مساءً.
ومن مجمع الأديان في مصر القديمة، وتحديدا من درب 17 18 هنكون على معاد مع عرض غنائي وتمثيلي عن الراحلة العظيمة أم كلثوم، العرض هيكون بطابع كوميدي شوية وبياخد جولة سريعة في حياة كوكب الشرق وأهم محطاتها الفنية والإنسانية، الدعوة عامة والحضور مجاني، والبداية هتكون في تمام السادسة مساءً.
ونختم من مكتبة مصر الجديدة اللي هتستضيف حفل موسيقى لفرقة "ميوجن باند" في تمام الثامنة مساءً، بسعر تذكرة حضور 30 جنيه.
مساء سعيد، وخروجة ممتعة.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
