النهارده في القاهرة: حفل علي الحجار وعروض أفلام ومعرض منتجات يدوية
Cairo 360
النهارده رغم أنه عرض فيلم "اشتباك" ساحب الأضواء بشكل كبير لكن عشاق الحركة الليلية في القاهرة عندهم اختيارات تانية لو كانوا شايفين أن الفرجة على الفيلم مش أنسب حاجة ليهم.. تيجي على رأس الفعاليات دي حفلة الفنان الكبير علي الحجار في ساقية الصاوي الساعة 9:00 مساءً، وأسعار تذاكرها بتبدأ من 60 جنيه لغير أعضاء الساقية، و 55 للأعضاء.
غير كده المركز المصري للفنون الشعبية "مكان" المستضيف الدائم لفرقة "مزاهر" لعروض الزار هيقدم لنا النهاردة فرصة جديدة لمشاهدتهم والاستمتاع بأحد أقدم الفنون الشعبية وأكثرها أصالة، سعر التذكرة 30 جنيه، والعرض هيبدأ 8:00 مساءً.
كمان هيستمر مركز "دال" للأبحاث في جاردن سيتي باستضافة عروض الأفلام كل أربعاء من كل أسبوع، اللي بيبقى مختارها بعناية شديدة علشان يضمن تقديم وجبة سينمائية دسمة وغنية فكريًا و قيميًا للحضور.. والمرة دي معادنا مع الفيلم الإيطالي "The Conformist" اللي هيتم عرضه هناك الساعة 7:30، وكالعادة الدعوة عامة والحضور مجاني.
ولليوم التاني على التوالي بعد افتتاحه امبارح هيكمل معانا النهارده معرض "الوقت الماسي" اللي كنا قلنا لكم امبارح أنه معرض لمنتجات يدوية تم تنفيذها في ورشة فنية سابقة حملت نفس اسم المعرض، والمنتجات كلها معروضة للبيع بأسعار رمزية.
أيًا كان اختياركم وخطتكم لتقضية اليوم.. يارب تنبسطوا.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
