The Definitive Guide to Living in the Capital , Cairo , Egypt

الحياة في كايرو

النهارده في القاهرة: حفل نوبي وحفل موسيقى عربية وعروض مسرح وسينما

النهارده في القاهرة: حفل نوبي وحفل موسيقى عربية وعروض مسرح وسينما
بواسطة
Cairo 360

 

زق يابني معايا الأسبوع زقة، خلي الدنيا تمشي أسرع وأخف من كده شوية، وهات لنا معاك كام إيفينت من الأجندة يزقوا معانا.. عينيّا يا بيه.

أول زقة النهارده جاية لنا من بعيد أوي، من أراضي النوبة، الفنان فرح المصري والفنان مصطفى هيركي ومجموعتهم هيقدموا لنا الفن النوبي المبهج في المركز المصري للثقافة والفنون "مكان" في وسط البلد، سعر تذكرة الحضور 30 جنيه، وبداية الحفل في تمام الثامنة مساءً.

الزقة التانية من مسرح الهوسابير اللي مكمل عليه عرض مسرحية "البروفة" للفرقة الشبابية صاحبة المسرحية الشهيرة "1980 وأنت طالع"، سعر تذكرة الحضور 25 جنيه، والبداية من 5:00 مساءً.

ومن مسرح قاعة الحكمة بساقية الصاوي هنكون على معاد مع حفل موسيقى عربية لفرقة "عشاق الطرب" في تمام الساعة 8:00 مساءً، بسعر تذكرة حضور 25 جنيه.

وبعيدًا عن الحفلات وعروض المسرح هتستضيف سينما دكة التابعة لمؤسسة التعبير الرقمي العربي "أضف" عرض للفيلم الفرنسي المجمع "Paris, je t'aime"، وهو عبارة عن تجميعة لأفلام قصيرة بتعرض أشكال مختلفة للحياة في بعض مناطق عاصمة الجمال، الدعوة عامة، وبداية العرض في تمام الساعة 6:30 مساءً.

جبنالك اللي يزق معاك، باقي عليك زقتك أنت بقى.. اوعدنا أنك هتنبسط!

مقترح