النهارده في القاهرة: فايا يونان وحفلتين في الساقية و 1980 وأنت طالع!
Cairo 360
حفلات وعروض مهمة النهارده في القاهرة! وكلمة السر: الساعة 8:00 مساءً!
كالعادة الساقية بتفرض وجودها الدائم بفعالياتها الكثيرة والمتميزة، والنهارده مشاركة معانا في أحداث اليوم بحفلين غنائيين، الأول هيكون لفرقة "ذا باند" اللي بتسجل رجوعها بعد غياب طويل عن المسرح والجمهور، وده يخلينا نستنى منهم عرض قوي يثبتوا بيه أنهم رجعوا أقوى من الأول، الفرقة بتقدم موسيقى عصرية وبتناقش قضايا الشباب في كلمات أغانيها، الحفلة هتكون الساعة 8:00 والتذكرة بـ 20 جنيه.. والحفل الثاني هيكون للموسيقار "شاكر عبدالرحيم"، في نفس وقت الحفل الأول لكن على مسرح قاعة الحكمة، الساعة 8:00، وبنفس السعر لتذكرة الحضور، 20 جنيه.
وبعدين نروح لدار الأوبرا المصرية مع أبرز أحداث الأسبوع ويمكن الشهر كمان، حفل الفنانة السورية الشابة "فايا يونان" على المسرح المكشوف في تمام الساعة 8:00 مساءً.. الحفل تذاكره (75 جنيه) خلصت في نفس يوم نزولها، والجمهور المصري متطلع للقاء بمنتهى الحماس والشغف علشان يشوف "فايا" ناوية تعمل في أرواحهم بصوتها إيه!
ونختم مع لون مختلف من الفن وهو فن المسرح، من مسرح الهوسابير مع العرض المسرحي "البروفة" اللي بيقدمه نفس فريق عمل المسرحية الشبابية الأشهر في 2015، مسرحية "1980 وأنت طالع".. اللي بسببه الجمهور كله منتظر يشوف عرضهم الثاني هيكون عامل إزاي، ونتمنى أنهم يقدموا حاجة بنفس القوة والتميز، العرض هيبدأ الساعة 8:00، وسعر التذكرة 25 جنيه.. وكل تلات وانتو طيبين.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
