The Definitive Guide to Living in the Capital , Cairo , Egypt

الأيام الزحمة بالفعاليات بتدينا فرصة لطيفة للتنوع ومناسبة جميع الأذواق، وبتفتحلنا الباب لاختيارات كتير علشان كل واحد يروح الحاجة اللي يحسها مناسبه للـ mood العام بتاعه يومها.. والنهارده واحد من الأيام دي، فعاليات كتير، يعني اختيارات متعددة، وألوان مختلفة.

نبدأ من الفعاليات الثقافية اللي هنكون فيها على معاد مع جلسة نقاشية لكتاب "سؤال الأخلاق" في مركز دال للأبحاث في جاردن سيتي.. الفعالية بتقع ضمن سلسلة فعاليات نادي "دال" للكتاب، وكالعادة الدعوة عامة.. والبداية هتكون الساعة 6:00 مساءً.

أما عن فعاليات المسارح والعروض فهيكون موجود معانا -ومكمل- العرض المسرحي "ليلة من ألف ليلة" للفنان الكبير يحيى الفخراني على المسرح القومي بالعتبة، العرض بيبدأ 9:30 مساءً، وأسعار التذاكر بتترواح بين 30 و 100 جنيه.

وهيكون معانا عرض للتنورة ممكن نحطه تحت نفس النوع من الفعاليات على اعتبار أنه روح الفعالية هي الاستعراض المصاحب للموسيقى.. العرض هيكون في وكالة الغوري في منطقة الأزهر والحسين وبيبدأ الساعة 7:00 مساءً، وسعر تذكرة الحضور 5 جنيهات للمصريين و 30 للأجانب.

وضمن فعاليات المسرح برضه هيكون عندنا عرض مسرحية "نوبة صحيان" في قاعة الحكمة بساقية الصاوي.. العرض بتقدمه فرقة "يوتوبيا" للعروض المسرحية. هيبدأ العرض في تمام السابعة والنصف مساءً، وتذكرة الحضور 15 جنيه لأعضاء الساقية و 20 جنيه لغيرهم.

ومش هنطلع بره الساقية لكن هننتقل لقاعة أخرى هي قاعة النهر ونوع آخر من الفعاليات.. هنكون على موعد مع بداية إيفينت "مصيف الساقية" اللي هتطلقه الساقية النهارده وهيستمر لحد يوم 24 من الشهر الجاري، الفعالية هتضم مجموعة من الأنشطة الفنية والثقافية والترفيهية على مدار كل أيامها من الساعة 9:00 صباحًا للساعة 9:00 مساءً، وسعر تذكرة الحضور لليوم الواحد هتكون 15 جنيه.

ونختم مع الفعاليات الفنية من المسرح المكشوف بدار الأوبرا المصرية، اللي هنشوف فيه النهارده عرض فني آخر ضمن مهرجان الصيف للموسيقى والغناء. من فرقة "فؤاد ومنيب" اللي هيقدموا لنا عرض موسيقى ممتع كما العادة، وسعر تذكرة الحضور 35 جنيه، والبداية هتكون الساعة 8:00.. اضبطوا ساعاتكم علينا، وانطلقوا.