The Definitive Guide to Living in the Capital , Cairo , Egypt

النهارده في القاهرة: محمد محسن وأيامنا الحلوة والتنورة وأحداث أكثر

النهارده في القاهرة: محمد محسن وأيامنا الحلوة والتنورة وأحداث أكثر

أواخر الأسبوع اللي نفسنا بيكون انقطع فيها وبنبقى بندور على أي متنفس علشان نكمل الساعات الباقية على خير، وكتر خير القاهرة أنها شايلة لنا اليومين دول كام فعالية من اللي يفرحوا القلب علشان الدنيا تمشي.

النهارده هيكون يوم من العيار التقيل في فعاليات مهرجان القلعة، حفلتين من الآخر.. الأولى لفرقة "أيامنا الحلوة" الساعة 8:00 مساءً، والثانية هتكون مع الفنان "محمد محسن" الساعة 10:00 مساءً.. متطلعين جدًا للاستمتاع بالروح الحلوة والأداء المبهج من "أيامنا الحلوة"، والطرب والسلطنة من البرنس "محمد محسن".

ومن القلعة إلى مكان آخر ذي قيمة أثرية وتاريخية كبيرة، منطقة مجمع الأديان.. وتحديدًا من درب 17 18، هنكون النهارده على معاد مع ثاني أبرز الفعاليات وهي حفل فريق "رباعي أوتار" التابع لأوركسترا القاهرة السيمفوني، الفريق اللي اتعود يمتعنا بأداء المعزوفات الكلاسيكية العالمية باحترافية شديدة وإحساس مرهف، الحفل هيبدأ الساعة 8:30 مساءً وسعر تذكرة الحضور 50 جنيه.

ثالث أبرز الفعاليات النهارده هتكون فعالية بطعم وريحة التاريخ برضه، المرة دي من وسط البلد، من المركز المصري للفنون والثقافة "مكان"، اللي هيستضيف فرقة "مزاهر" لفنون الزار، وهو نوع من الغناء الشعبي القديم كانت بتحتل فيه المرأة الدور الأبرز في الأداء والعرض، سعر التذكرة 30 جنيه، والبداية هتكون الساعة 8:00 مساءً، لكن الدخول بيكون بدري عن كده نصف ساعة.

وفي الترتيب الرابع تيجي فعالية شعبية أخرى، عرض التنورة في وكالة الغوري في منطقة الحسين.. أحد أبرز العروض الفنية الثابتة التابعة لصندوق التنمية الثقافية بدار الأوبرا، العرض هيبدأ الساعة 7:00 مساءً، وسعر التذكرة 5 جنيهات للمصريين و 30 للأجانب.

بعد كده نبعد شوية ونروح لجاردن سيتي في سينما دال علشان نشوف هتقدم لنا إيه في سلسلة العروض الأسبوعية ليها الأربعاء ده؟ .. الدور على فيلم كلاسيكي آخر من أفلام الستينات، الفيلم الإيطالي "Blow-Up".. كالعادة الدعوة عامة والحضور مجاني، وبداية العرض 7:30 مساءً.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح