The Definitive Guide to Living in the Capital , Cairo , Egypt

الحياة في كايرو

النهارده في القاهرة: مسارح وحفلة للنفيخة وعرض سينمائي لبرنامج قصة الإله

النهارده في القاهرة: مسارح وحفلة للنفيخة وعرض سينمائي لبرنامج قصة الإله
بواسطة
Cairo 360

على غير العادة هنلاقي فعاليات المسرح مكتسحة الأجندة بتاعتنا خلال الفترة دي، وده شيء طبيعي لأنه زي ما إحنا عارفين المهرجان القومي للمسرح بدأت فعالياته من 19 يوليو الجاري ومستمرة لحد يوم 8 أغسطس.

الساعة 9:00 مساءً على مسرح العرائس في العتبة هيقام العرض المسرحي "قواعد العشق" عن رواية "قواعد العشق الأربعون" لإليف شافاق.. الرواية اللي من ساعة ما طلعت لحد دلوقتي وهي متربعة على عرش الأدب الصوفي المعاصر.. الدعوة عامة وحضور العرض مجاني، لكن اتأكدوا أنكم هتروحوا بدري علشان تضمنوا مكان.

و الظاهر أنه ساقية الصاوي هي كمان قررت تواكب فعاليات مهرجان المسرح وهتقدم لنا النهارده العرض المسرحي "هيبتا" اللي مأخوذ من رواية للكاتب الروائي "محمد صادق" بتحمل نفس الاسم. وسعر التذكرة 35 جنيهًا لغير الأعضاء و 30 للأعضاء، والعرض هيبدأ 7:30 مساءً.

ونبعد عن المسرح من غير ما نبعد عن الساقية.. هنلاقي مسرح قاعة النهر النهارده بيستضيف حفل موسيقي مميز لفرقة "النفيخة" اللي بيقدموا موسيقى خفيفة ومبهجة على آلات النفخ النحاسية المختلفة، وسعر التذكرة 30 جنيهًا للأعضاء و 35 لغير الأعضاء، والحفلة هتبدأ الساعة 8:00 مساءً.

ولو قررنا نروح بعيد شوية ناحية مقر مركز "ربع السلام" في مصر الجديدة هنلاقيهم النهارده بيبدأوا عرض حلقات برنامج "قصة الإله" اللي كان قدمها النجم العالمي "مورجان فريمان" على قناة "ناشيونال جيوجرافيك".. العرض هيكون على يومين، النهاردة وبكرة.. وهيبقى من الساعة 6:00 للساعة 9:00، والحضور هيكون مقابل 20 جنيه لليوم الواحد، أو 35 لليومين.. مشاهدة سعيدة.

 

حفلات وأنشطة أكثر هتلاقوها على أجندتنا في اللينك ده.. اخرجوا واستمتعوا

 

مقترح