The Definitive Guide to Living in the Capital , Cairo , Egypt

نعتقد أننا هريناكم كلام عن قد إيه رمضان في مصر مش زي رمضان في أي بلد ثانية، وأن رمضان جميل والدنيا فيه بتبقى مختلفة والحاجات الحلوة دي كلها. بس في الكام سنة اللي فاتوا رمضان ما بقاش بس بيجي والخير وياه، ده بقى بيجي ومعاه حبة حاجات ثانية مبتذلة نفسنا نخلص منها. القائمة دي فيها مجموعة "الحاجات الثانية" اللي بتيجي مع رمضان:

إعلانات التبرعات

اللي عايز يتبرع ويعمل خير مش محتاج لا إعلان، ولا مستني رمضان علشان يكثف جهوده في بناء المجتمع. فيه ناس ممكن تشوف أن لولا الإعلانات دي ما كانش الواحد سمع عن الأماكن اللي ممكن تتبرع فيها… ماشي، نعمل إعلان ما نعملش ليه؟ بس مش لازم يعني نفرتك فلوس كثير على إنتاج الإعلان، وخصوصًا أن الإعلانات دي بيبقى آخرها توطي الصوت أو تقلب القناة –يعني غير مجدية بالمرة.

الفواصل الإعلانية

نعتقد أنها من الحاجات اللي هنشتكي منها بس مش هنقدر نتغلب عليها؛ لأن مقياس نجاح (نجم – برنامج – مسلسل) بقى بعدد الإعلانات اللي بتجيله.  فطبيعي جدًا أننا نقعد بالنص ساعة نتفرج على إعلانات مقابل 10 دقائق من مسلسلك أو برنامجك المفضل. غالبًا النصف ساعة دي بيكون الواحد نسي فيها هو بيتفرج على إيه أساسًا.

رامز جلال

نعتقد أن رامز جلال ممكن يدفع مديونية البلد وهو مستريح لو أخد جنيه واحد في كل مرة حد ينتقده. كل سنة الواحد بيتمنى أن ربنا يرحمنا من أفكاره الجهنمية ومقالبه، بس على مين؟ والحقيقة اللي ما نقدرش ننكرها أن رامز جلال ناجح نجاح منقطع النظير؛ أنه يقدر بأفورته أنه يعمل جدل على السوشيال ميديا وحتى في الجرائد، وأنك تتفرج ولو على جزء من الحلقة لمجرد أنك تشوف هو هيحصل إيه فيها، كل ده في حد ذاته نجاح.

يا ترى لو الشعب المصري تجاهله لمدة رمضان واحد، ممكن يحصل إيه؟

الحلويات المهجنة

ما لها الكنافة العادية؟ ما لها القطايف اللي بتتحشي بأي حاجة موجودة في البيت؟ إحنا بالنسبة لنا الحلويات يا شرقي يا غربي… إنما الافتكاسات العجيبة اللي محلات الحلويات بتعملها في رمضان دي مش قادرين نفهمها. ده إحنا لو كنا في مجاعة وبتحطوا لنا بواقي الحلويات اللي عندكم على بعض علشان تسدوا جوعنا ما كنتوش عملتوا فينا كده.

رمضان فاشون كوليكشن

وبما أن رمضان بقى موسم لحاجات كثير، فأكيد ما جاتش على الموضة؛ بقالنا كم رمضان كل بوتيكات الموضة بتتسابق على مين يعرض أكبر "رمضان فاشون كوليكشن"، وأغلبية القطع بتبقى عبارة عن عبايات مستخدم فيها قماش الخيامية، أو أقمشة عليها خط عربي.  بالرغم من أن بالنسبة لنا كوليكشن السنة اللي فاتت مش فارق عن كوليكشن السنة دي، إلا أن السنة دي فيه مجموعة من العبايات اللي عليها بكار وبوجي وطمطم… ينفع كده؟