The Definitive Guide to Living in the Capital , Cairo , Egypt

أسبوع خفيف، بدأ بدري، ونهايته كمان جاية بدري، ودي حاجة يلزم لها خروجة لطيفة بقى!

نظرة سريعة على أجندتنا النهارده تخلينا ننبسط ونطمئن، ده لأنه الفعاليات منوعة التنوع المطلوب لإرضاء جميع الأذواق والمطالب.

البداية هتكون من المركز المصري للثقافة والفنون "مكان" اللي هيكون على معاده المتكرر مع فرقة مزاهر لفن الزار الشعبي المصري، سعر تذكرة الحضور 30 جنيه، والبداية هتكون 8:00 مساءً.

ومن درب 17 18 هنكون على معاد مميز آخر مع فرقة كراكيب اللي بتيجي حفلتهم كحلقة في مسلسل حفلات "مزيكا في السطح" اللي بينظمها المكان، سعر تذكرة الحضور 50 جنيه، والبداية هتكون 7:00 مساءً.

أما قاعة النهر بساقية الصاوي فهتكون على معاد مع عازف آلة الساز المميز محمد يحيى، سعر تذكرة الحضور 25 جنيه، والبداية هتكون 8:00 مساءً.

في حين هتستضيف سينما دال بجاردن سيتي عرض لفيلم "Eyes wide shut"، وكالعادة دعوة عامة وحضور مجاني، والبداية هتكون في تمام السابعة والنصف مساءً.

ده غير فعاليات منوعة أخرى زي مقهى روم اللغوي اللي هيبدأ 7:00 مساءً، واللي بيتعمل بشكل أسبوعي وبيتشارك فيه المهتمين بممارسة اللغات المختلفة.. وغير فعاليات أخرى مستمرة معانا من قبل كده زي عرض باليه سبارتاكوس في المسرح الكبير بدار الأوبرا اللي هيبدأ 8:00 مساءً، وزي فعاليات مهرجان الجيزويت للفيلم اللي هتبدأ في جيزويت القاهرة من الساعة 5:00 مساءً.

إجازة سعيدة، وكل سنة ومصر طيبة، وتعود علينا الأمجاد بخير.