The Definitive Guide to Living in the Capital , Cairo , Egypt

بنحس بجمال الحياة، لما نتأمل جمال الألوان ونعمل الحاجات اللي بنحبها ونفضل نكتشف كل يوم حاجة جديدة سواء عن نفسنا أو عن العالم، وده اللي بنحاول نوفره في دليلك لويك إند سعيد، بتوفير حفلات وأنشطة ثقافية تعرفكم على عوالم مختلفة من المتعة.

ونبدأ بيوم الخميس، وهتلاقوا مركز المصطبة للموسيقى والفنون التراثية اللي مستضيف مسرح الضمة بوسط البلد عامل حفل لفرقة الطنبورة البورسعيدية، وسعر التذكرة 30 جنيه. وفي ساقية الصاوي على مسرح قاعة الحكمة فيه حفلتين لعرض "أم كلثوم تعود من جديد" واللي هيقدمه مسرح الساقية للعرائس على أنغام أغنيتي "اسأل روحك – هذه ليلتي". وبيبدأ العرض الأول 6 مساءً، بينما والثاني 8 مساءً، وسعر التذكرة 15 جنيه لغير الأعضاء، بينما لأعضاء الساقية 10 جنيه. أما في مكتبة "أ" فرع الميرغني توقيع ومناقشة رواية "الطريق إلى السيدة العجوز" للكاتب محمد آدم، والدعوة عامة.

وننتقل ليوم الجمعة، وعلى مسرح قاعة النهر بساقية الصاوي فيه حفل غنائي للفنان علي الهلباوي، وسعر التذكرة 40 جنيه. كمان فيه حفل لفرقة المولوية المصرية بقيادة الفنان عامر التوني بمسرح الجمهورية، والتذاكر متاحة بشباك الحجز، وأسعار التذاكر 35، و50 جنيه. أما على مسرح ساقية الصاوي للعرائس عاملين عرضين مسرحيين بعنوان "الطفل المعجزة" و"أغلى من الذهب"، وسعر تذكرة الحضور 15 جنيه. كمان فعاليات مهرجان الجيزويت للفيلم في دورته الثالثة، مستمرة حتى الجمعة 7 أكتوبر، واللي بتعرض أفلام متنوعة.

ونختم بيوم السبت، كمان مسرح قاعة النهر بساقية الصاوي فيه حفل للإنشاد الديني والابتهالات مع مجموعة "وصلة سماع"، وسعر التذكرة 20 جنيه لغير الأعضاء، و15 جنيه للأعضاء. والمسرح المكشوف بدار الأوبرا المصرية مستضيف حفل غنائي لفرقة "عمدان النور" اللي بتحتفل بعيد ميلادها الخامس في الحفل ده، وسعر التذكرة 50 جنيه.

لو عاوزين تعرفوا أحداث أكثر تابعوا أجندتنا اللي بننشر فيها كل يوم أحداث مختلفة على مدار الشهر.

ويك إند سعيد!