The Definitive Guide to Living in the Capital , Cairo , Egypt

فيه ناس كتير عايشة بس مش حاسة انها عايشة، مجرد أيام بتحصل فيها نفس الحاجات بشكل متكرر وبتعدي، وفي ناس مصممة أنها تعيش كل يوم في حياتها تجرب حاجة جديدة وتكتشف هي بتحب إيه وتمشي وراه، وده اللي بنحاول نساعدكم توصلوا له من خلال دليل كايرو 360 لويك إند سعيد.

ونبدأ بالنهارده يوم الخميس، فيه في مسرح الهوسابير عرض كوميدي حر بعنوان "The Xes"، وسعر تذكرة الحضور 25 جنيه. كل سنة في الوقت ده تقريبًا بيكون معاد "مهرجان سماع الدولي"، واللي بيكون فيه فرق غنائية من كل أنحاء العالم بتغني موسيقى روحية ممتعة، أوعوا تفوتوه وكل يوم بيكون عنده أكثر من حفلة في أكثر من مكان.

أما على مسرح الضمة في وسط البلد فيه حفل فني للغناء والاستعراض النوبي تقدمه الفرقة النوبية "نوبا نور"، سعر التذكرة 30 جنيه. وعلى مسرح الفلكي فيه العرض المسرحي "العشاء الأخير" للمخرج أحمد العطار، واللي بيجسد من خلاله عبثية علاقة أفراد الأسرة الواحدة في العائلة المصرية، وسعر التذكرة 40 جنيه.

وننتقل ليوم الجمعة، ومسرح قاعة النهر بساقية الصاوي عامل حفل لفرقة "الحضرة" مع فرقة "أوتار كوارتيت" التابعة لأوركسترا القاهرة السيمفوني، الحفل سيكون مزيج بين روحانية الحضرة ورقي الموسيقى الكلاسيكية، وسعر تذكرة الحضور 35 جنيه. كمان على مسرح الضمة بوسط البلد فيه حفل غنائي لفرقة "الأولة بلدي" واللي بتعيد تقديم التراث الغنائي للراحل العظيم الشيخ إمام عيسى، وسعر التذكرة 30 جنيه.

أما في قاعة الحكمة بساقية الصاوي فيه حفل غنائي لفرقة "بساطة"، وسعر التذكرة 50 جنيه لغير أعضاء الساقية و45 جنيه للأعضاء. برضه على مسرح الهوسابير  فيه عرض مسرحي كوميدي باسم "سكة سفر"، وسعر تذكرة الحضور 30 جنيه.

ونختم بيوم السبت، كمان بعد غياب طويل في قاعة النهر بساقية الصاوي فيه حفلتين لفرقة "كايروكي"، وسعر التذكرة 50 جنيه. وبرضه على مسرح الجنينة بحديقة الأزهر فيه حفل للفنان تامر أبو غزالة مع فرقة "Random House"، وسعر تذكرة الحضور 30 جنيه.

لو عاوزين تعرفوا أكثر عن أحداثنا اللي بننشرها كل يوم على مدار الشهر، تابعوا أجندتنا.

ويك إند سعيد!