The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: حفلات محمد منير وآمال ماهر وشارموفرز وزين محمود وبلاك تيما

دليل أحداث نهاية الأسبوع: حفلات محمد منير وآمال ماهر وشارموفرز وزين محمود وبلاك تيما
بواسطة
Cairo 360

مش كل الناس دايمًا بتحس بالسعادة أو الامتنان للي بتملكه لحد ما تفقده، يعني مثلًا تلاقي كل الناس بتشتكي من شغلها وأول ما تسيبه تندم أنها سابته، كل الناس بتتمنى تاخد أجازة وأول ما تاخدها تضيعها في أي حاجة غير اللي كانت عاوزة تعمله، وإحنا بنحاول من خلال دليلنا الأسبوعي أننا نوفر لكم أحداث ترفيهية وثقافية مختلفة تساعدكم تغيروا جو وتحسوا بالسعادة وأنتم بتعملوا الحاجة اللي بتحبوها.

ونبدأ بيوم الخميس وحفل ريسيتال بيانو للفنانة النمساوية أنا ماجدلينا كوكتيز في معهد الموسيقى العربية، وسعر التذكرة 25 جنيه، كمان على مسرح الهناجر فيه عرض مسرحي بعنوان "هاملت" وهو من تأليف ويليام شيكسبير ومن إعداد مناضل عنتر، العرض ده من العروض اللي حصلت على منحة مكتبة الإسكندرية، وأسعار التذاكر 20 و30 جنيه.

لمحبي الموسيقى الشبابية فيه على المسرح المكشوف بجامعة مصر للعلوم والتكنولوجيا حفل للفنانة آمال ماهر مع فرقة "شارموفرز"، وأسعار التذاكر: 100 (وقوف) – 250 – 400 جنيه، أما في مركز الربع الثقافي فهم عاملين حفل التنورة، ودي رقصة مستوحاة من الطرق الصوفية، وسعر التذكرة 10 جنيه.

وننتقل ليوم الجمعة، وعودة للشيخ زين محمود في حفل مديح وأغاني شعبية في علبة ألوان واللي هيضم كثير من الأغاني القصصية المتنوعة والمواويل بالإضافة للأناشيد الدينية، وسعر التذكرة 35 جنيه، كمان على المسرح المكشوف بدار الأوبرا المصرية فيه حفل موسيقي لعازفة آلة الماريمبا نسمة عبد العزيز، وسعر التذكرة 50 جنيه.

أما مفاجأة يوم الجمعة فهي من نصيب حفل محمد منير بالملعب في جامعة مصر للعلوم والتكنولوجيا، وأسعار التذاكر 150 – 450 – 600 جنيه. وكعادة كل يوم جمعة وعرض الأراجوز وخيال الظل في مركز إبداع بيت السحيمي، والدعوة عامة.

وننتقل ليوم السبت وحفل موسيقي لفرقة "بلاك تيما" في قاعة النهر بساقية الصاوي، واللي هتقدم مجموعة من الأغاني المصرية المعاصرة، وسعر التذكرة 50 جنيه. كمان فيه على المسرح الكبير بدار الأوبرا المصرية حفل لأوركسترا القاهرة السيمفوني بمناسبة عيد الفصح، والحفل بعنوان "موتزارتينا 3"، واللي هيعزفوا فيه مجموعة من أعمال موتزارت، وهيقود الأوركسترا المايسترو أحمد الصعيدي، والتذاكر متاحة بشباك الحجز.

وللمبدعين والفنانين ما تفوتوش معرض Maker Faire Cairo 2016 في الحرم اليوناني، واللي بيضم مبدعين من جميع المجالات؛ بداية من الهندسة والطهي وحتى الحرف اليدوية. ونختم كالعادة بحفل التنورة في مركز إبداع وكالة الغوري، وسعر التذكرة 5 جنيه.

لو عاوزين تعرفوا أكثر عن أحداثنا اللي بننشرها كل يوم على مدار الشهر، تابعوا أجندتنا.

ويك إند سعيد!

مقترح