The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: حفل إبراهيم معلوف والحضرة والنفيخة ويوم خاص للسيدات بالساقية

دليل أحداث نهاية الأسبوع: حفل إبراهيم معلوف والحضرة والنفيخة ويوم خاص للسيدات بالساقية
بواسطة
Cairo 360

الإنسان الذكي بيختار يقضي حياته وهو بيحاول يعمل الحاجات اللي بيحبها، مش كل الناس بتقدر تعمل ده، بس الأكيد أن اللي قدر يعمل اللي بيحبه سعيد، وعلشان كده إحنا بنحاول نكون مصدر من مصادر سعادتكم في الأجازة، لما بنوفر لكم حاجات قيمة ومفيدة تستمتعوا بها في الويك إند.

ونبدأ بيوم الخميس، هتلاقوا في قاعة الحكمة بساقية الصاوي "سلسلة الأساتذة" ولقاء مع الشاعر جمال بخيت، وسعر التذكرة 25 جنيه لغير الأعضاء و20 جنيه، وفي الربع فيه حفل موسيقى عربية لفرقة "النهر الخالد" واللي بيتكون من مجموعة من المواهب الموسيقية الشابة، وسعر التذكرة 20 جنيه.

ولمحبي الأفلام المختلفة عن اللي في السينمات العادية، سينما زاوية فيها أسبوع للأفلام الإيبرو-أمريكية وهيعرض فيه مجموعة من الأفلام الجديدة من أمريكا اللاتينية والبرتغال وأسبانيا، وسعر التذكرة 25 جنيه، أما عن المسرحية اللي رجعت للكثير الأمل في المسرح المصري أن ترجع له أمجاده من ثاني، واللي على مسرح الهوسابير وآخر  عرض لمسرحية "1980 وأنت طالع" لأن ده الأسبوع الأخير لعرضها، وسعر التذكرة 15 جنيه.

وننتقل ليوم الجمعة، لمحبي الإنشاد الصوفي علبة ألوان عاملة حفل موسيقى روحية هتقدمه فرقة "الحضرة"، وسعر التذكرة 35 جنيه، أما لو بتحبوا الموسيقى الكلاسيكية  هتلاقوا في قاعة الحكمة بساقية الصاوي حفل موسيقي لفرقة "النفيخة" واللي مكون من خماسي آلات النفخ النحاسية: محمد سواح على آلة الترومبيت، أمير إبراهيم وأحمد إسماعيل على الترومبون، مساكي على آلة الباص توبا ورامي سامي على الساكسفون، وسعر التذكرة 35 جنيه.

وبمناسبة اقتراب عيد الأم أمريكانا بلازا منظمة بازار بمناسبة عيد الأم، واللي هيضم كثير من المنتجات والمعروضات من إكسسوارات وملابس، والدعوة عامة. وكعادة كل يوم جمعة وعرض الأراجوز وخيال الظل في مركز إبداع بيت السحيمي والدعوة عامة.

ونختم بيوم السبت وحفل موسيقي للفنان إبراهيم معلوف على مسرح الصوت والضوء بالأهرامات، وهو من أشهر عازفي آلة الترومبيت في العالم، كمان في ساقية الصاوي فيه حفل خاص للسيدات بقاعة النهر، والحفل هيضم العديد من الفعاليات الموسيقية والفنية زي الرقص ورسم الحنة، وسعر التذكرة 30 جنيه لغير الأعضاء و25 جنيه للأعضاء.

أما في حديقة الأسماك بالزمالك فيه بازار Cairo Flea Market واللي هيضم كثير من المنتجات اليدوية والمأكولات، والدعوة عامة، ونختم كالعادة بحفل التنورة في مركز إبداع وكالة الغوري، وسعر التذكرة 5 جنيه.

لو عاوزين تعرفوا أكثر عن أحداثنا اللي بننشرها كل يوم على مدار الشهر تابعوا أجندتنا.

ويك إند سعيد!

مقترح