The Definitive Guide to Living in the Capital , Cairo , Egypt

كل يوم الحياة بتفاجئنا بحدث جديد، ساعات بيكون حزين وساعات يكون مبهج، الفكرة في أننا نتأقلم معاه ونقوم بعد كل وقعة ونقاوم الحزن اللي جوانا بأننا نقضي وقت سعيد مع الناس اللي بنحبهم، ونخرج خروجة ممتعة وده اللي بنحاول نوفره لكم في دليل أحداثنا.

 

نبدأ بالنهارده يوم الخميس، وحفل "سعاد ماسي" في كايرو فيستيفال سيتي مول، وأسعار التذاكر تبدأ من 250 جنيه حتى 650 جنيه. كمان فيه عرض غنائي لفرقة "آخر زفير" على مسرح الجنينة، وسعر التذكرة 30 جنيهًا.

ولكل عشاق فنون المسرح ما تفوتش أبدًا العرض المسرحي "الرمادي" عن رواية 1984 للكاتب الأنجليزي جورج أورويل في مسرح الهناجر بدار الأوبرا المصرية، وأسعار التذاكر 20 جنيه لغير الطلبة، و10 جنيه للطلبة. برضه علبة ألوان بالزمالك عاملة عرض هايل لعرائس الماريونيت لكن للكبار على غير العادة، وسعر التذكرة 30 جنيهًا.

 

وننتقل ليوم الجمعة، وخبر مبهج لكل محبي الأفلام المختلفة وهو أن سينما "ونس" عاملة عرض للفيلم السويدي "بيكاس" واللي بيحكي قصة من الأراضي العراقية، والحضور مجاني. أما لو عاوز تقضي يوم مختلف  ففيه مفاجأة من تنظيم مشترك بين "نوبيان نايتس" مع ساقية الصاوي  وهي حفل للاحتفال بعيد الربيع على الطريقة النوبية، الحفل هيكون فيه فقرات غناء واستعراض على الطريقة النوبية، بالإضافة لفقرات رسم الحنة النوبية ومعرض للمشغولات النوبية.

نداء خاص لكل السميعة واللي بيقدروا الصوت الجميل، فيه حفلة للفنانة العظيمة ماجدة الرومي في مسرح الصوت والضوء بالأهرامات، وأسعار التذاكر تبدأ من 600 جنيه إلى 3000 جنيه.

 

ونختم بيوم السبت، عارفين لما تروحوا مكان وروحك تطوف حواليك بتحوال تفهم إجابات أسئلة كتيرة محيراها أول ما فهمتها بدأت تطوف برضه بس من حبها للي خلقها، هي دي التنورة من وجهة نظرنا، وكالة الغوري عاملة حفل لفرقة التنورة التراثية، واللي بتقدم الرقصة الشهيرة المستوحاة من تراثنا الصوفي، وفيه بعض الحكايات التاريخية الي بتقول أن الفيلسوف والشاعر التركي الصوفي جلال الدين الرومي هو أول من قدم رقصة الدراويش، وسعر تذكرة حضور الحفل 5 جنيه للمصريين و30 جنيه للأجانب. كمان معرض كتب مركز الربع لسه مستمر، واللي بيبيعوا فيه كتب مستعملة طوال أيام الشهر من الساعة 9:00 الصبح للساعة 9:00 بليل، وسعر الكتاب سعره ما بين جنيه واحد لعشرين جنيه بس.

 

لو عاوزين تعرفوا أكثر عن أحداثنا اللي بننشرها كل يوم على مدار الشهر تابعوا أجندتنا.

ويك إند سعيد!