The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: عرض مولانا وستاند آب كوميدي ومحمد محسن وأوركسترا السيمفوني

دليل أحداث نهاية الأسبوع: عرض مولانا وستاند آب كوميدي ومحمد محسن وأوركسترا السيمفوني
بواسطة
Cairo 360

من نعم ربنا علينا في البلد دي أن يوم الخميس بـ ييجي هادئ بدون منغصات سياسية أو أمنية من أول ما بدأ القلق في السنتين ثلاثة اللي فاتوا، شوية زحمة في المرور وبمجرد ما بـ تعديها وتقابل صحابك أو تدخل العرض اللي رايح تتفرج عليه هـ تبقى مبسوط وأعصابك هادئة بنسبة كبيرة، وعارف أنك هـ تمشي في طريقك بأمان وأنت مروح البيت ومش هـ تقابل مسيرات ولا قطع طريق إلا فيما ندر. من موقعنا هذا بـ نوجه التحية لكل من حافظ على يوم الخميس أنه يفضل أجمل أيام الأسبوع والأقرب لقلب المواطن المصري، وده بعد تدمير كل سمعة طيبة مرتبطة بيوم الجمعة وطقوسه وخصوصًا في الشهور الأخيرة، وربنا يعديها على خير.

الليلة دي ورغم البرد القارس فيه عدد كبير من العروض اللي حابين نرشحها لكم، نبدأ بعرض “مولانا” عن رواية بنفس الاسم للكاتب إبراهيم عيسى، وهو عرض رقص حديث ومعاصر على مسرح الجمهورية التابع لدار الأوبرا المصرية. التذاكر متاحة بشباك تذاكر دار الأوبرا بالجزيرة أو بمسرح الجمهورية نفسه، لمزيد من التفاصيل برجاء الاتصال بمكتب الاستعلامات: 27390132 – 27390188. 

وعلى المسرح الكبير بدار الأوبرا تقدم الفرقة القومية للموسيقى العربية حفل بمناسبة ذكرى الفنان فريد الأطرش، أسعار التذاكر بـ 50 و 75 و100 جنيه، وللطلبة 75 – 50 – 35 جنيه، الدخول الساعة 8 مساءً. 

المطرب محمد محسن اللي شارك في إعلان “بحتاج لك وتحتاج لي” الشهير هـ يقدم الليلة دي حفل غنائي بقاعة النهر بساقية الصاوي، سعر التذكرة 30 جنيه والدخول الساعة 8 مساءً. 

مركز المصطبة للموسيقى الشعبية هـ يقدم الليلة دي أجواء صوفية خاصة ممزوجة بموسيقى الزار لفرقة أبو الغيط في جو روحاني بديع بمسرح الضمة للفنون الحرة. سعر تذكرة حضور الحفل 30 جنيه عند الباب، وبـ 20 جنيه عند الحجز المسبق.

ساقية الصاوي بـ تستضيف واحد من أكبر مهرجانات الستاند آب كوميدي في مصر يضم أكثر من 15 واحد من أهم الكوميديانات المصريين منهم علي قنديل وعلي الطيب وأمير عزت بقاعة الحكمة، بدأ المهرجان إمبارح الأربعاء وهـ ينتهي النهارده، وسعر التذكرة 30 جنيهًا لليوم الواحد. 

مكان ثقافي جديد فتح قريب في شارع محمد محمود في وسط البلد وهو “القاعة الضّيقة” أو كما يطلق على نفسه “فضاء التجريب الفني”. هو ومكتبة البلد عاملين معرض للتصوير الفوتوغرافي بعنوان (بيرسونا) للفنانة ليليان وجدي وهـ يتم افتتاحه النهارده. 

يوم الجمعة هـ يكون أول يوم لعرض الرقص المعاصر بعنوان Souls من تصميم الراقص ومصمم الرقصات الفرنسي أوليڤييه دوبوا يعرض لأول مرة على مستوى العالم هنا في مسرح الفلكي بجوار الجامعة الأمريكية بالتحرير، سعر التذكرة 10 جنيه. 

والساعة 7 مساءً هـ يبقى فيه حفل للمنشد والمرتل علي الهلباوي اللي هـ يقدم مجموعة من الأغاني الدينية مع الموسيقى الغربية بقاعة الحكمة بساقية الصاوي، سعر التذكرة للأعضاء 15 جنيه، ولغير الأعضاء 20 جنيه. 

يوم السبت مركز آيس كايرو في وسط البلد بـ يقدم لك بازار أعمال يدوية للكريسماس، من هنا ممكن تشتري هدايا معمولة بأيدين مصممين وحرفيين مصريين، والبازار نفسه قعدته حلوة وفيه مزيكا وأكل وجو احتفالي ظريف.

وزي ما تعودنا يوم السبت بـ يبقى فيه حفل أوركسترا القاهرة السيمفوني بالمسرح الكبير في دار الأوبرا المصرية والمرة دي الفرقة بقيادة المايسترو نادر عباسي. برنامج الحفل بـ يتضمن أعمال جمال عبد الرحيم وبروكوفيف وراخمانينوف وتشايكوفسكي، لمزيد من المعلومات عن التذاكر برجاء الاتصال بـ 27390114 – 27398114.

في الأيام اللي جاية هـ يبقى عدد كبير من البازارات والفعاليات اللي لها علاقة باحتفالات الكريسماس والعام الجديد، تابعوا أجندة الموقع يوم بيوم، واستمتعوا بالجو البارد جدًا اللي مش بـ يتكرر كثير على مدار السنة.

مقترح