The Definitive Guide to Living in the Capital , Cairo , Egypt

دليل أحداث نهاية الأسبوع: عمر خيرت ومعرض أنا والآخر ونوبانور ومعرض فوتوغرافيا في تاون هاوس

دليل أحداث نهاية الأسبوع: عمر خيرت ومعرض أنا والآخر ونوبانور ومعرض فوتوغرافيا في تاون هاوس

كان المفروض ده يبقى آخر ويك إند في أطول أجازة نصف عام من 3 سنين، لكن تم تأجيل الدراسة أسبوعين كمان لحد 8 مارس، كده كده إحنا عندنا مجموعة من الحفلات والعروض والمسرحيات اللي حابين أنكم تحضروها في نهاية الموسم الشتوي، وقبل فترة الراحة اللي هـ تشهد المراكز الثقافية قبل انطلاق موسم الربيع الجديد في نهاية شهر مارس. اختياراتنا لحضراتكم الأسبوع ده ركزنا فيها على العروض المسرحية والفنون غير التقليدية، لكن الأمر لا يخلو من بعض الموسيقى ومش أي موسيقى كمان، موسيقى من طراز “عمر خيرت”.

الليلة دي وبعد النجاح الكبير لحفلات الموسيقار عمر خيرت وتلبية لرغبات جماهير الإسكندرية، وكمان القاهريين اللي بـ يروحوا وراه مخصوص للإسكندرية، قررت إدارة دار الأوبرا المصرية إقامة ثلاث حفلات متتالية للموسيقار عمر خيرت بأوبرا الإسكندرية، وهـ يقدم من خلالهم برنامج فني متنوع يتضمن باقة من أشهر مؤلفاته الموسيقية اللى قدمها على مدار مشواره الفني، سعر التذاكر 250 -200 -150، لمزيد من المعلومات اتصل بالأرقام دي 034800138، 034865106. 

ممكن تزور معرض بعنوان أنا والآخر فى جاليرى آرت توكس أو Art Talks يقدم أعمال الفنان المصري صبري جرجس بعد عام من رحيله بعد 60 عام من العطاء. المعرض مغلق أيام الجمعة، يعني ممكن تروح النهارده أو يوم السبت. 

ضمن برنامج عروض مسرح الفلكي للموسم الشتوي هـ يبقى فيه عرض مسرحي مميز بعنوان “البرازيل… ليلة واحدة” في القاهرة.. وهو عرض مسرحي باللغة العربية من إخراج ماركو ماجوا، وبـ يتكلم عن أحداث حقيقية عن سيدة تعيش في البرازيل بـ ترسل خطابات لأحفادها في القاهرة وبـ تحكي عن تجربتها هناك. الدعوة عامة، والعرض بدأ من من يوم 19 ومستمر لحد يوم 22 فبراير ماعدا يوم 21 فبراير. 

معرض ثاني مهم في مركز الجزيرة للفنون اللي بـ يدعوكم لحضور مهرجان الجزيرة للفوتوغرافيا في دورته الثانية واللي بـ يضم أعمال 28 مصور من مختلف أنحاء العالم، الدعوة عامة، والمعرض ده قوي جدًا بشهادة بعض أصدقائنا اللي زاروه مؤخرًا وهو مستمر لحد يوم 12 مارس اللي جاي. 

تاون هاوس جاليري فيه معرض فوتوغرافي بعنوان “بيت الصور التاريخية النادرة” للمصور باري أيفرسون، الدعوة عامة. 

الليلة دي الساعة 8 مساءً مركز المصطبة للموسيقى الشعبية بـ يدعوكم لحضور حفل اللآليء السمراء ونجوم النوبة “فرقة نوبانور”..عروض الموسيقى والرقص والأغاني التراثية اللي مش هـ تلاقيها في أي مكان تاني، سعر التذكرة عند الباب 30 جنيه و20 جنيه عند الحجز المسبق. 

حفل موسيقي وغناء للمغنية الصاعدة نغم صالح في بيت الرصيف في المعادي ومجموعة من أغاني الفلكلور لكن بطريقة جديدة وتوزيع مختلف. نغم قدمت أغاني الشيخ إمام قبل كده مع فرقة بركة وهي أخت المطربة المشهورة مريم صالح، سعر التذكرة 25 جنيه. 

بكرة الجمعة هـ يبقى أطول يوم في تاريخ مسرح العرائس (11 عرض عرائس) فيهم  كل ما استمتعتم به من عروض مسرح عرائس الساقية هـ تشاهدوها كلها فى يوم واحد من الصباح حتى المساء في قاعة الحكمة، وده في إطار احتفال ساقية الصاوي بالذكرى الـ 11 لتأسيسها. سعر التذكر للأعضاء 10 جنيه ولغير الأعضاء 20 جنيه لليوم كامل.  

ودار الأوبرا المصرية هـ تقدم العرض التاريخي الأسـطوري سبارتاكوس لفرقة باليه أوبرا القاهرة على المسرح الكبير وبمصاحبة أوركسترا أوبرا القاهرة بقيادة المايسترو ناير ناجى، تصميم رقصات وإخراج فالنتين أيليزاريف، سعر التذاكر 100-75-50 جنيه وللطلبة 75-50-35 جنيه. 

يوم السبت ممكن تحضر أي من المعارض اللي ذكرناها فوق لأن كلها مستمرة لأكثر من أسبوع جاي، وتابعوا أجندة الموقع لمعرفة تحديثات جداول العروض أول بأول، ونتمنى لكم أجازة أسبوعية مفيدة ومثالية.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح