دليل أحداث نهاية الأسبوع: فرقة نوبانور والخان ومهرجان اسمع واشبع ومسرحية المقام
Cairo 360
كل أسبوع بنحاول نوفر لكم كل الأحداث اللي تخليكم تستمتعوا بكل دقيقة في الويك إند، وبتكون متنوعة ما بين حفلات ومعارض ومسرحيات، واللي بنستمر في عرض مواعيدها كل يوم في الشهر مش في الويك إند بس.
نبدأ بالنهارده يوم الخميس، وحفل "فرقة الأخوة أبو شعر" في ساقية عبد المنعم الصاوي، وسعر التذكرة 40 جنيه. وفي الساقية برضه بس في قاعة الحكمة فيه حفل غنائي للفنان مصطفى رزق واللي بيقدم موسيقى البلوز بس في قالب ثقافي مصري. كمان على مسرح الضمة بمنطقة وسط البلد فيه حفل فني للغناء والاستعراض النوبي هتقدمه الفرقة النوبية "نوبا نور"، وسعر التذكرة 30 جنيه.
وننتقل ليوم الجمعة، وحفلة مختلفة في دار الأوبرا المصرية وعلى المسرح المكشوف لعازف البيانو محمد فؤاد مع عازف الكمان أحمد منيب، وسعر التذكرة 35 جنيه. كمان مكتبة مصر العامة فرع الدقي عاملة "جلسة مناقشة لكتاب قواعد العشق الأربعون لإليف شافاق"، والحضور مجاني.
أما لو عاوزين تجربوا حاجة جديدة، الـ "جريك كامبس" بوسط البلد عاملين مهرجان "اسمع واشبع" للأكل والموسيقى هيجتمع فيه فرق كتير زي زاب ثروت وفرقة أسفلت وغيرهم، وسعر التذكرة 60 جنيه. برضه فريق "مشربية" عامل زيارة لجامع عمرو بن العاص ومقياس النيل في منطقة مصر القديمة، والفريق عبارة عن مجموعة من الشباب خريجي كلية الآثار بيحاولوا ينشطوا السياحة الداخلية وزيادة الوعي الأثري.
ولعشاق الإنشاد الصوفي ماتفوتكمش "حفل فرقة الحضرة" في ساقية الصاوي، وسعر التذكرة 30 جنيه للأعضاء و 35 جنيه لغير الأعضاء. برضه فيه عرض مسرحي اسمه "المقام" من بطولة أعضاء فرقة "وجوه" للعروض المسرحية، والعرض مأخوذ من النص المسرحي "مدد مدد" للكاتب "أحمد أبو هيبة"، الدخول مجاني. كمان مركز الربع الثقافي فيه حفل موسيقي لفريق "اوتار كوارتيت" أو "رباعي أوتار" واللي هيقدم ألوان مختلفة من الموسيقى الكلاسيكية، وسعر التذكرة 30 جنيه.
ونختم بيوم السبت، ولعشاق فن الحكي فريق "مشروع المريخ" عامل فعالية بعنوان "ميكروفون مفتوح" واللي هي عبارة عن جلسة حكي مفتوح من جميع المشاركين في الفعالية، تقام الفعالية في درب 17 18 بمنطقة مجمع الأديان في مصر القديمة. كمان مسرح الهناجر بدار الأوبرا المصرية عامل عرض مسرحي بعنوان "الزومبي والخطايا العشر" ضمن فعاليات المهرجان المسرحي اللي بينظمه مركز الهناجر للفنون، وسعر التذكرة 10 جنيهات للطلبة، و20 جنيه لغير الطلبة. وبرضه ساقية الصاوي فيها حفل غنائي لفرقة "الخان" اللي بتقوم بتقديم مزيج راقي من الموسيقى الشرقية التراثية مع الموسيقى الغربية الكلاسيكية، وسعر التذكرة 25 جنيه.
لو عاوزين تعرفوا أكثر عن أحداثنا اللي بننشرها كل يوم على مدار الشهر، تابعوا أجندتنا.
ويك إند سعيد!
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
