دليل كايرو 360 لأفضل تطبيقات حجز الطيران والفنادق فى القاهرة والخارج
Mohamed Hamdy
“فى السفر سبع فوائد”.. الأمثال القديمة علمتنا الحكمة دى، واكتشفنا بعد سنين طويلة أن فى السفر أكثر من سبع فوائد كمان، وسواء كان السفر للمتعة أو للعمل، التكنولوجيا الحديثة قدرت تخلى السفر أسهل وأمتع، وبالتأكيد أرخص، كايرو 360 بـ تقدم لكم موضوع عن أفضل تطبيقات حجز تذاكر الطيران والفنادق على مستوى العالم علشان تضمنوا سفر أسهل وأرخص وأكثر تنظيمًا.
Expedia:
واحد من أشهر وأكبر تطبيقات السفر على الهواتف المحمولة، ممكن تحميله لمستخدمى نظام IOS (iPhone, iPad) أو مستخدمى نظام الأندرويد، وممكن طبعًا الدخول مباشرة لموقعهم الإلكترونى.
استعملنا إكسبيديا على الـ iPhone قبل فترة من صدور آخر تحديث له، بعد التحديث النهائى للتطبيق حسينا أن شكله أصبح أكثر شياكة وسهولة من غير ما يتنازل عن المبدأ الأساسى له فى توفير كل الإمكانيات فى شكل واحد، وبمجرد فتح التطبيق هـ يتم سؤالك أنت عاوز حجز الفنادق ولا الطيران، لو دخلت على حجز الطيران هـ يسألك عن مطار المغادرة ومطار الوصول والتاريخ للذهاب والعودة بأسلوب ذكى وسريع وسهل لأى مستخدم، بالإضافة لسهولة وسرعة البحث على كل مطارات العالم، لكن هـ يكون من الأسهل لو استعانت بأكواد (أياتا*) لمطارات العالم للوصول لبحثك بسهولة وسرعة أحسن من البحث بالاسم الكامل للمطار، فى آخر موضوعنا هـ تلاقى قائمة بأشهر أكواد “أياتا” للمطارات.
قسم الفنادق فيه ميزة جميلة هى إمكانية البحث عن أقرب الفنادق وفقًا لموقعك الجغرافى، ودى كويسة لو كنت فى بلد غريب ومش عارف أقرب فندق لك، أما عن ترتيب نتائج البحث تقدر تختار الأرخص أو الأقرب أو الأكثر فخامة.. إلخ، وبـ يمتاز أسلوب عرض النتائج (خصوصًا نتائج رحلات الطيران) بالسرعة والسهولة، وتقدر تدفع ثمن تذكرة الطيران أو حجز الفندق مباشرة من الفيزا الخاصة بك أو تتابع أى حجز قديم قمت بعمله قبل كده، من الآخر حجز سريع ودقيق.
Kayak:
من التطبيقات المشهورة فى المجال السياحى لأنه تقريبًا بـ يقدم كل شىء! حجز طيران وفنادق وسيارات وخدمات داخل المطار قبل السفر وبعده، وتقدر من خلاله تعرف أدق التفاصيل عن سفرك حتى سياسات الوزن المستخدمة فى شركات الطيران المختلفة.
كاياك فى موقعه الرسمى بـ يقول أنه التطبيق رقم 1 فى السفر والسياحة بواقع ما يزيد عن 25 مليون مرة تحميل، لكن التعامل مع التطبيق ممكن يواجهه بعض الصعوبة خصوصًا للمستخدم الحديث أو اللى بـ يسافر للمرة الأولى، لكن بشكل عام أكواد “أياتا” للمطارات ممكن تسهل عملية البحث بشكل كبير، بالإضافة لقسم متابعة الرحلات متميز على التطبيق ده لأن بمجرد ما تعرف بعض المعلومات القليلة عن أى رحلة طيران ممكن تشوفها على شاشة التليفون أو التابلت وهى مسافرة أمامك، ودى ميزة جميلة لو عاوز تشارك قرايبك تجربة سفرهم وأنت قاعد فى مكانك أو للاطمئنان على خط سير الرحلة وظروفها، طبعًا تقدر تعمل Share لحجوزاتك على مواقع التواصل الاجتماعى، لكن ما تنساش الخصوصية علشان ما تقعش فى مشاكل، والتطبيق متاح للتحميل على IOS أو أندرويد على حد سواء.
Flightaware:
بما أننا بـ نتكلم على متابعة رحلات الطيران لا يُعلى على تطبيق “Flight Aware” لمتابعة رحلتك الجوية أنت أو أى حد يهمك أمره.. من اللحظة الأولى لفتح التطبيق المدعوم على IOS وأندرويد هـ تعرف أنه شبه متخصص فى متابعة حالة الطيارة، بمجرد البحث عن رقم الطيارة أو مطار الإقلاع والهبوط أو حتى خط سير الرحلة هـ تقدر تشوف الطيارة على شاشة تليفونك وتعرف ارتفاعها وحالة الجو ومعلومات كثير بـ تتحدث لحظيًا بمجرد تغيرها.
الأمتع فى التطبيق -وجربناه بنفسنا- أنه ممكن يستكشف الطائرات اللى موجودة فى محيط قريب منك، ويعطيك نبذة مختصرة عنها! ورغم أن الـ option ده مش مفيد بشكل عملى إلا أنه من الممتع أننا نعرف وإحنا بـ نكتب الموضوع ده أن فيه طائرة لمصر للطيران بـ تمر من فوقنا، وأنها متجهة إلى جدة! زى ما قولنا هى حاجة مش مفيدة بشكل عملى لكن ممكن نعتبرها نوع من أنواع “استعراض العضلات” من التطبيق اللى بـ يحظى بنسب تحميل عالية وبـ يتميز الموقع بالتنظيم والدقة.
Booking:
طالما بـ نتكلم عن التخصص فى تقديم الخدمات نقدر نقول أن تطبيق Booking.com المتاح للتحميل على أندرويد وIOS متخصص لدرجة كبيرة فى الفنادق، الإعلان الرسمى للتطبيق بـ يفتخر أنه بـ يقدم لك أكثر من 333 ألف فندق فى جيبك!
لو بـ نتكلم عن التطبيق بالأرقام أكثر هـ نقول أنه بـ يحتوى على أكثر من 8 مليون صورة لفنادق، و22 مليون مقال نقدي من نزلاء حقيقيين للفنادق وممكن نقول بسهولة أن التطبيق عبارة عن شبكة اجتماعية للفنادق وتقييمها، ولازم تبص عليه قبل ما تعمل حجز فى أى فندق علشان تأخذ معلومات أوضح وأشمل عن الفندق اللى هـ تقيم فيه مدة سفرك.
Priceline:
تطبيق سريع وسهل لكن فيه بعض العيوب، بـ يأتى من نفس الشركة المالكة لتطبيق كاياك وBooking.com وبـ يمتاز أنه الأسهل والأسرع فى الفتح والتعامل، لكن علشان تدخل على حجوزاتك لازم تعمل اشتراك مجانى فى الموقع الأول، وده يعتبر من عيوب التطبيق المتاح للتحميل على IOS وأندرويد.
Trip Advisor:
تطبيق بـ يتميز بألوانه الصريحة ومحاولة جمع كل ما يتعلق بالسفر والأجازات، يعنى تقدر من خلاله تجهز لكل حاجة خاصة بالرحلة بتاعتك وأنت قاعد فى مكانك، بداية من حجز الطيران والفندق والعربية اللى هـ تنقلك أو هـ تنتقل بها بالإضافة لحجز المطاعم وكمان بـ يقدم لك مقالات نقدية عن المطاعم والفنادق وخدمات الطيران مقدمة من باقى العملاء، بالإضافة لترشيحاتهم الشخصية للأفضل فى 2013، تقدر تحمل التطبيق على IOS أو أندرويد بالإضافة لبعض التطبيقات اللى بـ تقدم لك معلومات عن المدن والمطارات والحياة الليلية وكل حاجة ممكن تحتاجها فى سفرك.
* أكواد “أياتا” للمطارات:
هى أكواد دولية معترف بها لمطارات الدول المختلفة، من الأسهل أنك تستعملها فى أى تطبيق تكلمنا عنه لتفادى الخطأ فى هجاء أسماء المطارات ولتسهيل وتسريع عملية البحث، عدد الأكواد ضخم للغاية لكن هـ نحاول نقول لك الأشهر منهم:
القاهرة CAI
برج العرب – الإسكندرية: HBE
النزهة – الإسكندرية: ALY
شرم الشيخ: SSH
أسوان: ASW
ميلانو: MXP
روما: FCO
باريس: CDG
ميونخ: MUC
أمستردام: AMS
هيثرو: LHR
نيويورك: JFK
جدة: JED
الرياض: RUH
الدمام: DMM
الدوحة: DOH
عمان: AMM
مسقط: MCT
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
