دليل كايرو 360 لأهم برامج رمضان 2016
Ahmed Abd El Gawad
زي ما كلنا بنستنى المسلسلات في رمضان، علشان بيبقى لها طابع خاص، كمان برامج رمضان لها شكل خاص ولها طابع بيحسسنا كده أن رمضان جانا، وفرحنا به! من كام سنة كده بقى لنا ثوابت كلنا بنستناها يعني برامج بتضحك، وبرامج دينية، وبرامج مقالب.. وعالم تاني خالص.. تعالوا نتعرف عليه.
برامج مقالب
مع الانتقادات الكتير اللي اتوجهت له كان لازم رامز ييجي السنة دي ويقول: "خلاص مش هعمل المقالب العجيبة دي في الناس تاني، خلاص هبطل، العجيب بقى أن رامز جلال ما غيرش من الموضوع خالص، بالعكس قرر أنه يصعبه، وعمل "رامز بيلعب بالنار" واللى عنه اتسربت أخبار كتير منها انفجارات في المغرب، ونجوم بيحصلها حاجات غريبة، وأنه بطل مصارعة ضرب رامز ودخل المستشفى، وأن فيه هجوم على رامز بعد تسريب الفكرة، وهو بيحاول يرد ويدافع عن برنامجه.. عمومًا كلنا هنشوف البرنامج على MBC مصر ونحكم.
كلنا اتعودنا على الفنان هاني رمزي في رمضان، فيه ناس كانت مع أنه يقدم برامج مقالب، وناس تانية قالت أنه فنان جيد وبس، لكن ماينفعش يقدم برامج.. برنامج "هاني في الأدغال"، هيقدمه الفنان المصري هاني رمزي، وهو من ضمن برامج المقالب اللي هتدخل السباق في رمضان القادم. هاني رمزي، اختار جنوب أفريقيا لتصوير البرنامج، وادينا مستنيين نشوف البرنامج على قناة الحياة، ونعرف هيعمل إيه السنة دي..
برامج دينية
برنامج "خواطر" كان من البرامج اللي سمعت في كل أنحاء الوطن العربي تقريبًا، ومن خلال الفكرة دي بقى أحمد الشقيري واحد من أهم إعلامي العالم العربي، وكمان من اللى اتصنفوا من أصحاب الإعلام الهادف، ومع الأفكار الجديدة اللى دايمًا كان بيعملها كل سنة، اتصدمت كل الناس لما قال أن الموسم السنة اللي فاتت هو هو آخر موسم، وكل الناس كانت مستنية يا ترى هيعتزل ولا هيعمل إيه، وطبعًا فاجأ الكل أنه عمل فكرة هايلة تانية بتخدم مجال الإعلام الهادف وقايمة على الشباب وتسجيلهم لأفكار إعلامية جديدة ومبتكرة، كلنا مستنيين نشوف "قمرة" على مجموعة MBC.
اشتهر بطريقته المختلفة و(تون) صوته الغريب على الآذان، واشتهر بأفكاره عن الحب والتسامح، واللي جاية من اسمه "الحبيب" واللى هيقدم برنامج "أيها المريد" للداعية الحبيب علي الجفري وهيتعرض على قناة “سي بي سي” وقالت الأخبار أن تصوير برنامج “أيها المريد” تم في كازاخستان، وقال الحبيب إن البرنامج مختلف من ناحية الشكل والمضمون عن معظم البرامج الدينية.
طلعت أخبار إن عمرو خالد السنة دي مش هيقدم برامج وهيكتفي أنه يعمل برنامج على اليوتيوب بتاعه وبس، ودي كانت أحسن دعاية له، علشان الناس تدخل تلاقى فكرة برنامج على قناته الخاصة على اليوتيوب، لكن برضه علشان تلاقيه عامل برومو لبرنامجه الجديد "طريق الحياة" على مجموعة MBC، واللى فيه هيكمل برنامج الإيمان والعصر اللي بدأه السنة اللي فاتت، وفيه هيعرض 30 قانون ومبدأ في الحياة مع الله والناس والنفس.
أما الدكتورة عبلة الكحلاوي فهتقدم برنامج اسمه "اللهم تقبل" على قناة إم بي سي مصر، البرنامج هيعرض كل يوم وهيقدم كتير من الأفكار والقيم المهمة.
ولو كنت بتدور على جرعة روحانية فبرنامج من "القلب للقلب" اللي بتقدمه إيمان رياض، هيعرفك على كل أحكام الصيام ومُبطلاته وأي سؤال بيشغل بالك هتلاقي له إجابة على لسان ضيوف البرنامج وكلهم من علماء الأزهر.. آه.. نسينا نقول لك أن البرنامج هيعرض على إم بي سي مصر.
ولو كنت من المعجبين بمصطفى حسني فتقدر تشوفه يوميًا في رمضان من خلال برنامج "فن الحياة" اللي هيعرض على شاشة قناة النهار طول رمضان، البرنامج بيقدم نصائح وإرشادات بشكل بسيط ومختلف، ومصطفى هيقولك فيه إزاي تقضي شهر رمضان بطريقة مختلفة.
برامج أكل
أما قنوات الطبخ فقررت تقضي رمضان بشكل مختلف هيشترك فيه كل شيف موجود في القناة، بانوراما فوود هتعمل "مهرجان أكلات رمضان"واللي فيه هتقدم أفكار جديدة لكل العزومات اللي ممكن تتعمل في رمضان، وكمان أفكار للوجبات السريعة، وأفكار للسحور اللي مايتعبش القلب ولا يعطش، خاصة أن رمضان جاي فى الصيف، و#وحوي_يا_كايرو وكل سنة وانتم طيبيين..
مقترح
تسوق
خلّي السعادة تكمل.. تشتري منين أحلى شوكولاتة في القاهرة؟
أفضل أنواع الشوكولاتة أماكن بيع شوكولاتةـ محلات شوكولاتة +3
الحياة في كايرو
