The Definitive Guide to Living in the Capital , Cairo , Egypt

الحياة في كايرو

دليل كايرو 360 لكيفية قضاء وقتك أثناء انقطاع التيار الكهربائي

دليل كايرو 360 لكيفية قضاء وقتك أثناء انقطاع التيار الكهربائي
بواسطة
Nagla Ashraf

كلنا بـ نعاني حاليًا من قطع الكهرباء المستمر، واللي بـ يزيد أو بـ يقل على حسب درجات الحرارة، إحنا في غنى عن ذكر الرجل الخفي اللي بـ يلعب بسكينة الكهرباء واللي جنن دماغنا، هـ تلاقي مننا اللي لسه بـ يفرح ويقول “هيييييييه” أول ما النور ييجي، وهـ تلاقي اللي ما بقيتيش تفرق معاه وفرهض من الحر.

كايرو 360 حبت تساعدك وتختار لك أكتر من وسيلة تشغل بها وقتك وأنت قاعد مستني النور ييجي:

 

اشحن ونزل كل اللي بـ تحبه

مبدأيًا حاول تشحن كل الأجهزة اللي ممكن تستخدمها والنور موجود، زي اللاب توب، والآي باد، والموبايل، لأنك أكيد هـ تحتاجهم. حاول تستغل وجود النور بأنك تنَزل كتب عاوز تقرأها، ولو محتار تنزل كتب لمين، ممكن نقترح لك كتاب وشعراء عظماء، زي مصطفى محمود، ومحمود درويش، وأحمد مطر، ومصطفى صادق الرافعي، أو أي مجال أنت بـ تحب تقرأ فيه، أو ممكن تشوف قسم الكتب، ممكن كمان تنزل مسلسل بـ تحب تتفرج عليه، أو برنامج من ناشيونال جيوغرافيك، وبرضه ممكن تعرف Options أكثر من خلال قسم الأفلام والتليفزيون الخاصين بنا.

 

العب وزقطط ما يهمكش

ممكن تشتري بازل 3D أو بازل عادية وأنت بـ تختار عدد القطع اللي أنت محتاجه سواء 100 قطعة أو أكتر، كمان ممكن تلعب لعبة “أشكال الظل” أنت والأطفال اللي في البيت وتألف لهم قصص حلوة ومضحكة، وممكن تخرج في البلكونة أو الجنينة (إذا كان فيه) وتشوى مرشميلو أو تأكل آيس كريم.

 

اوعى تستسلم للحر وتعبه

خليك دائمًا جاهز، زجاجة مياه في الفريزر، وثلجك جاهز. واشرب كل شوية مياه، شرب المياه مفيد جدًا عامة، وبـ يساعدك تتجنب أمراض كثير، وحط الثلج في كيس بلاستيك وبعدين حطه على رأسك أو أيديك.

 

جرب تلعب يوجا

لو الدنيا مش حر قوي ممكن تلعب يوجا أو تعمل Meditation، وتصفي ذهنك من كل هموم ومتاعب اليوم.

اليوجا رياضة جميلة جدًا، بـ تهدي أعصابك وتساعدك أنك تأخد قرارات سليمة بالذات لو لعبتها في مكان مفتوح على الطبيعة.

 

سدد اللي عليك أول بأول

كل واحد فينا عنده رصيد في بنك العلاقات الاجتماعية لو ما حطيتش فيه اللي يكفيك  في رحلتك في الدنيا، هـ تلاقي نفسك فلست قبل ما توصل لنصف السكة وبقيت لوحدك.

انتهز فرصة أن النور مقطوع واتصل بأهلك وأصحابك واطمئن عليهم وعلى أحوالهم، هـ تفرحهم بسؤالك وهـ تفرح لفرحتهم.

 

أكون أو لا أكون.. هي دي الزيتونة

في وسط زحمة الحياة فيه قرارات كتيرة بـ نأخذها من غير تفكير، وفيه قرارات مؤجلة علشان مش لاقيين وقت نفكر فيها.

وأدي النور قطع وعندك كل الوقت أنك تفكر في حياتك، ومستقبلك، أو أي قرار أخدته وندمت عليه بعد كده، فكر أنت ليه أخدت القرار ده وقيم الموقف بسلبياته وإيجابياته علشان ما تغلطش نفس الغلطة تاني، أي قرار بـ تأخده عامة لازم تدرسه من جميع الاتجاهات وتقيم سلبياته وإيجابياته. وخلي بالك قوي من المحكمة اللي بـ تعملها لنفسك، ما تكونش قاضي ظالم ولا متساهل، حب نفسك وافهم رغباتها، وحدد لها الطريق المضبوط اللي تمشي فيه.

 

تأمل.. اصبر.. ارحم

تأمل بعين المفكر اللي بـ يدور على حقيقة وأصل الأشياء.

ممكن تنتهز الفرصة وتتأمل في السماء، فكر في عدل وستر ربنا عليك في كل تفاصيل حياتك، فكر في حب الناس لك وإزاي دي نعمة وحب من ربنا، أو ركز في تنوع المخلوقات اللي ربنا خلقها علشان تمتع حضرتك، وتوفر لك اللي أنت محتاجه.

اصبر وعافر على الواقع اللي تاعبك لحد ما تحقق اللي نفسك توصل له. اصبر على كل اللي بـ يضايقك وبـ يزهقك وهـ تلاقي الفرحة في آخر الطريق. اصبر على وطنك، وعلى قدرك، وعلى قدراتك.. ده طريق الألف ميل بـ يبدأ بخطوة.

ارحم قلبك من كل حاجة ممكن تجرحه، لو زعلان من حد فهمه غلطه بحب، ولو مش عاوز تكلمه يبقى تسامحه، بس ما تسيبش قلبك أبدًا يفضل زعلان ومقهور من حد أو من موقف، قلبك أغلى من أنك تلوثه بالكره والحقد. خليك مطمئن بأن قلبك بين أيدين ربنا، كل اللي بـ يحصل فيه خير علشان يُوصلك به، املأ قلبك بالنور هـ تلاقي النور والخير والحب دائمًا معاك.

 

آخر حاجة ممكن تعملها أنك تنام وترتاح، وتدعي ربنا أنه يعدي رحلة الحياة اللي إحنا عايشينها على خير ونور وبركة ورضا.

مقترح