The Definitive Guide to Living in the Capital , Cairo , Egypt

يوسف جلال، شاب مصري ملهم، عنده عشرين سنة، أصيب بالسرطان، لكنه قرر يختار الحياة، ويواجه المرض بشجاعة، اتألم كتير، لكن رغبته في الإنتصار على المرض كانت أكبر من الألم، وفي النهاية انتصر يوسف في حربه ضد السرطان، وبالفعل شفي تمامًا من المرض، بعدها قرر يحكي حكايته للناس ويكتب تجربته مع السرطان في كتاب جديد اسمه (محارب)، تعالوا نعرف يوسف قال إيه لكايرو 360.

 

 

 

أكيد فترة الإصابة بالسرطان فترة صعبة.. اتعلمت منها إيه؟

اتعلمت  إني ما أديش حد أو حاجة أكبر من حجمهم  الطبيعي، وأن مافيش داعي أو سبب قوي يخليني أعيش كائن تعيس، وأن الحياة بمطباتها  الكتير دي ميزة مش عيب، المطبات والصدمات بتعلمنا، المهم نواجه وما نخافش، أما بالنسبة للسرطان فأنا اتأكدت أنه زيه زي دور البرد، السرطان ضعيف جنب الإرادة، علشان كده بقول أن مش كل مرض أخره موت ومش كل ضعف بعده أضعف، كله يكمن  في الإرادة والروح اللي مصممة تعافر وتعيش.

 

هل شايف أن كتاب محارب ممكن يغير الصورة الذهنية عن مرض السرطان؟

أتمنى أنه فعلًا يغير الصورة الغلط  عن السرطان، باعتباره مرض فتاك أقوى من كل علاج، نفسي نشيل  جملة "المرض اللي ما يتسمى" دي من قاموس حياتنا، مافيش مرض  فتاك أبدًا، كلها اختبارات، ونسبة النجاح فيها بتتوقف على قوة روحك، الشعر اللي بيقع بيطلع أحلى منه، والضحكة إن بهتت فترة فمسيرها هتنور، كل حاجة بتبوظ  بترجع  أحلى، وده عن تجربة.

هل بتعتبر كتابك جرعة أمل لكل مريض بالسرطان أنه يقدر يتغلب على المرض؟

كتابي فيه مواقف كتير صعبة، قصدت أني أذكر منها على قد ما أقدر، عشان أعيش  الناس حالة الألم اللي كنت فيها، وبعد كده نقلت بقى للجانب التاني من انتصاري، حبيت أهتم  بالصعب، علشان الناس في الآخر تلاقي أن ما فيش حاجة ملهاش حل.

 

إيه أصعب حاجة بيعاني منها مريض السرطان؟

أصعب حاجة بيعاني منها مريض السرطان هي الحالة النفسية، لو حالته النفسية مش حلوة ده بيكون له تأثير سلبي، وكمان نظرة المجتمع والناس اللي فيها نسبة شفقة وده بيسبب الإحباط.

عرفنا أنك قررت تكمل في رحالة الكتابة.. أيه مشاريعك الجاية؟

أنا حاليًا شغال على كتابين، الأول رواية أدب ساخر أو تقدر تسميها خواطر بالعامية، والكتاب الثاني رواية اجتماعية، يا رب شغلي يعجب الناس ويكون قريب منهم، وهراعي دائمًا إني أكتب بالعامية علشان أوصل للناس أسرع.