The Definitive Guide to Living in the Capital , Cairo , Egypt

القهوة.. عالم كامل مليان تفاصيل مدهشة، كيان مصري مش ممكن تلاقيه في أي مكان في الدنيا، القهوة حاجة مختلفة عن الكافيه، القهوة يعني قعدة بسيطة شعبية على كراسي خشب، يعني شاي وقهوة وشيشة مش عصير ونسكافيه وآيس كريم، في المقال ده هنقول لكم على أسباب مهمة تخليك لازم تجرب قعدة القهوة.

 

الأصوات الجميلة

القهوة لازم تكون صاخبة، ودوشة، هي كده، وإحنا بنحبها كده، كوكتيل من الأصوات المتداخلة، صوت العامل وهو بيقول "واحد شاي سكر بره"، صوت الملاعق وهي بتقلب السكر في المشروبات، صوت الدومينوز، وصوت الناس اللي قاعدة حواليك وهي بتحكي حكايتها أو بتتخانق على ماتش كوره، حاجة هتخليك مستمتع وعمرك ما هتحس بسببها بصداع. ويا سلام لما تقعد على قهوة عمرها سنين طويلة، مشغلة إذاعة الأغاني القديمة، الله على البهجة.

 

وشوش المصريين

فيه ميزة حلوة للقهوة في مصر، وهي وشوش المصريين اللي قاعدين عليها، لو بصيت عليها بتأمل هتشوف كل تفاصيل مصر، تجاعيد عواجيزها اللي بتعبر عن الألم والمعاناة والتعب، علشان يوفروا لعائلاتهم لقمة العيش، وشوش شباب لسه في بداية حياتهم مليانة أمل وأحلام بالحرية، وشوش بنات رافضة الحياة التقليدية وعاوزة تتمرد على المألوف.

 

دخان الشيشة

دخان الشيشة في قهاوي وسط البلد بنكهاته المختلفة بيدي للقهوة طعم مميز، طعم التفاح والكنتالوب والبطيخ، هتحس أن كل شوية دخان حواليك خرجوا من شخص ما كبديل للتنهيدة، تنهيدة الحزن، اليأس، أو حتى الحب، بص على وش كل واحد بيشرب شيشة حواليك وأنت هتفهم إيه اللي جواه.

 

عمرك ما هتكون حزين

مش شرط يكون معاك أصحابك لو عاوز تقعد على القهوة، دائمًا فيه كرسي فاضي منتظر شخص وحيد ومخنوق ومتضايق، بمجرد قعدتك على القهوة هتلاقي نفسك أفضل، والخنقة هتقل كتير، وممكن تكون محظوظ وتلاقي حد قريب منك وحيد زيك، وتبدأ معاه حوار، والحوار يوصل لحوار، والخنقة تقل وتقل لحد ما تختفي، وهترجع بيتك يومها وعلى تليفونك رقم إنسان جديد.. قابلته هناك.. على القهوة.

 

مافيش ويتر ، فيه قهوجي

القهوجي جدع، عمره ما هيرخم عليك ولا يقول لك كل شوية "تشرب حاجة؟" القهوجي بيسيبك براحتك، ولو جايب معاك ساندوتشات هينزل لك كوباية مياه من غير ما تطلب منه، ومش هيقول لك الأكل من الخارج ممنوع، زي ما بيحصل في الكافيه، القهوجي بيفرح بأقل بقشيش، جنيه ممكن يخليه يشوفك باشا، ولو مامعكش فلوس زيادة للبقيش عادي جدًا مش هيبص لك بصة وحشة!

 

القهوة حياة، وسبب وجيه للبهجة في مصر.