The Definitive Guide to Living in the Capital , Cairo , Egypt

تسوق
إمبرينت – Imprint

إمبرينت: أدوات مكتبية على ذوقك وأكثر في الزمالك

  • 32 شارع شجرة الدر
  • مكتبات
  • 9 صباحًا - 10مساءً -
تم التقييم بواسطة
Dina Mokhtar
قيم
قيم الآن
إمبرينت: أدوات مكتبية على ذوقك وأكثر في الزمالك

مع انتشار المكتبات المتخصصة في بيع الكتب في القاهرة، واللي بـ تخصص ركن لأدوات الكتابة، بقى سهل جدًا أنك تلاقي أنواع وأشكال مختلفة منها، ولكن في النهاية المكتبات دي كلها بـ تبيع تقريبًا نفس المجموعة اللي العين أخذت عليها وما بقاش فيها أي جديد. إمبرينت – Imprint في الزمالك موجود فيه مجموعة مختلفة من الأدوات المكتبية اللي مش موجودة في أي مكان ثاني، ومش بس كده أنت ممكن تعملها على ذوقك كمان.

بما أن المعروضات كلها ألوان، المحل ديكوراته معتمدة الأبيض سواء في فرشه أو الحوائط اللي عليهم كتابات ورسومات بالأسود لشخصيات مشهورة زي مارلين مونرو. الواجهة الزجاجية فيها مجموعة من الصور المطبوعة على لوحات ممكن تعلق، وسبورة مكتوب عليها We Print Your Dreams (نطبع لك أحلامك)، لأن إمبرينت ممكن يطبع لك أي صورة أو رسمة أنت بـ تحبها على تقريبًا كل حاجة؛ سواء مج، تي شيرت أو حتى غلاف شوكولاتة هـ تقدمها في مناسبة مهمة. الظريف كمان أنهم ممكن كمان يعدّلوا على صورك الفوتوغرافية، وتبقى على هيئة Pop Art  (مدرسة فنية الصور بـ تبقى كرتونية بألوان فاقعة عادة).

وسواء أنت اللي جايب التصميم أو الصورة، سعر اللوحات موحد؛ مقاس حوالي 20X20 بـ (125 جنيه) أما المقاس الأكبر فهو حوالي 35X50 بـ (300 جنيه). المعروض منهم شكلهم النهائي ممتاز عجبنا منهم صورة لفرقة البيتلز.

مجموعة الأدوات المكتبية الجاهزة للبيع كبيرة وتصميماتها مختلفة؛ معظمها لوجوهات فرق روك مشهورة زي The Rolling Stones والبيتلز، ده غير تصميمات ثانية منها تصميم لجماجم ملونة بألوان قوية. الكشاكيل لها ثلاث أحجام الأكبر والوسط بسلك (30 و20 جنيه)، أما الأصغر بدون سلك وغلافها أقوى وبالتالي سعرها (35 جنيه). بنفس التصميمات لاقينا مجموعة حوافظ الأقلام (50 جنيه)، و Coasters واللي منها نوعين، الأول من الخشب (10 جنيه) والثاني فهو من الأكريليك وسعره (15 جنيه). أمام الكاونتر مجموعة من الملفات الورقية (11 جنيه) تصميماتها أبسط ومعظمها هندسية.

حسينا أن الشخص القائم على خدمة البيع بـ يتعامل معنا بحذر، وخصوصًا لما كنا بـ نسأل عن الحاجة اللي مش مكتوب عليها أسعار، بس إحنا تعودنا خلاص على ردود أفعال أصحاب المحلات لما بـ يعرفوا أننا بـ نتفرج بس ما بـ نشتريش!

نصيحة 360

إمبرينت كمان عنده شنط حريمي ممكن تطبعي عليها التصميم اللي تحبيه.

أحسن حاجة

فكرة أنك تقتني حاجة على ذوقك من الألف للياء.

أسوأ حاجة

الحذر الشديد اللي تعامل معنا به البائع.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح