The Definitive Guide to Living in the Capital , Cairo , Egypt

المعرض موجود في مكان هادئ جدًا وهو أبراج بدر في زهراء المعادي بالقرب من الطريق الدائري، لاحظنا أن المنطقة بدأت تتحول ببطء لسوق للأثاث والمستلزمات المنزلية والديكورات بعد ما فتح عدد من المحلات والمعارض في نفس المكان في الكام سنة الأخيرة، وواضح أن المنطقة هـ تبقى مقصد كثير من الناس من اللي بـ يجهزوا شققهم أو بـ يجددوا الفرش. محل «إيه إم فيرنتشر – A M Furniture» فتح من شهور قليلة وعبارة عن معرض لمنتجات المصنع الموجود في المريوطية، وده مش المعرض الوحيد لكن فيه واحد ثاني في شارع 9 في المقطم. وأول حاجة لفتت انتبهانا طبعًا كانت الاسم وافتكرنا أنه فرع من محلات American Furniture الشهيرة اللي بـ تستخدم حروف A M كاختصار لاسمها وبـ تكتبه على لافتات المحلات الخاصة بها، لكن الموضوع كان مجرد تشابه أسماء، وإن كان ما حبكش يستخدموا نفس الحروف في اسم المحل وهم بـ يبيعوا نفس المنتج.

المهم دخلنا المعرض الهادئ، وكنا لما شفناه من الخارج افتكرناه بـ يعمل مطابخ بس لأن كل اللي ظاهر من الواجهة الزجاجية كان مطابخ مودرن، لكن عرفنا لما دخلنا أنه معرض صغير فيه عينات للعرض من منتجات المصنع، بـ يعمل كل حاجة تتخيلها، ممكن تختار من التصميمات الموجودة في سابقة الأعمال اللي هـ يفرجك عليها مدير المعرض على الكمبيوتر، وممكن تأخذ التصميم اللي أنت عاوزه معاك وهم هـ يعملوه بحرفية عالية، وتأكدنا من ده لما شوفنا بعض النماذج للغرف اللي أنجزوها بنفس الشكل الموجود في الصور المأخوذة من كتالوجات عالمية، لكن طبعًا جودة التقفيل ونوع الخشب حاجة ما نقدرش نحكم عليها من الصور.

إدارة المعرض بـ تقول للعميل تقدر تروح تستلم من المصنع قبل مرحلة الدهان، وتعاين “اللمسات النهائية” بنفسك وما تستلمش لو فيه أي حاجة مش عاجباك، هو التسليم بـ يأخذ وقت شوية، حد أقصى 45 يوم لكن هم غالبًا بـ يسلموا في اليوم الـ 35 والدفع بـ يبقى 50% عند التعاقد و35% في زيارة المصنع و15% عند الاستلام، والتوصيل والتركيب على المعرض طبعًا.

شوفنا مطابخ ممتازة من حيث التصميم ونوع الخشب اللي عرفنا أنه كونتر زان، المتر هنا (فوق وتحت) بـ 1500 جنيه شامل المقابض والزجاج لكن من غير الإكسسوارات والكماليات زي الصفايات والرخام، غالي شوية بس واضح أنه يستاهل، فيه مهندس متخصص بـ ييجي البيت يرفع المقاسات وبـ يطلع التصميم ملائم تمامًا للمساحة حتى لو كانت صغيرة جدًا، شوفنا أمثلة على ده في سابقة أعمالهم. نفس الكلام في غرف النوم اللي أسعارها بـ تتراوح من 12000 جنيه لحد 25000 جنيه، وغرف السفرة من 12000 لـ 20000 جنيه، وشوفنا ليڤينج ودريسنج روم وفيه بعض الترابيزات والكونسول المعروضة هنا بأسعار من 1000 لـ 3000 جنيه، وهي غالية كدة لأن الخشب نفسه من أجود الأنواع، وهـ تحس بالفرق بينه وبين الموجود في معارض كبيرة مشهورة بالأثاث المودرن اللي بـ تستخدم أخشاب الـ MDF الأقرب للكرتون المضغوط، لكن برضه الغالي ثمنه فيه، والأسعار فيه النهاية تبدو مبررة.

فيه ضمان على منتجات «إيه إم فيرنتشر» مدى الحياة، بمعنى أنك بـ تبلغ لو محتاج صيانة لأي حاجة اشتريتها من هنا، وبـ يتم تحديد ميعاد خلال 3 أيام وييجي الصنايعي يصلح المشكلة بدون أي مقابل، خدمة جيدة بـ تعلي من أسهم المحل.

من تجربتنا في المعرض ومع إدارة المكان شعرنا بالاحترافية والاهتمام بالعميل، لكن التجربة العملية حاجة ثانية، وانطباعنا الجيد عن المعرض مرتبط بشراء أو تصنيع غرفة أو مطبخ ونعرف مدى التزامهم بكل اللي قالوه، لأن الالتزام في الحاجات دي بقى عملة صعبة، لكن في النهاية عجبنا معرض «إيه إم» للأثاث ونتمنى أنهم يعيدوا التفكير في موضوع الاسم.