The Definitive Guide to Living in the Capital , Cairo , Egypt

زمان، وبالذات في مصر، أي شخص بـ يجهز بيته كان بـ يهتم بثوابت محددة في الفرش والديكور، زي مثلًا الصالون الكلاسيكي للضيوف -واللي غالبًا مابـ نفتكرش شكله أصلًا لأنه مغطى بطبقة “بياضات”، وما بـ يتكشفش غير للضيوف. ده غير السفرة الخشب، واللي لازم يكون معها أشهر قطعة أثاث في مصر، ألا وهي “النيش”، واللي بـ تمثل متحف مضغوط لكل مقتنيات أهل البيت، وبغض النظر عن مساحة المكان هـ تسمح أو لأ، لازم يكون فيه الفرش المتعارف عليه… علشان إحنا مش أقل من أي حد ثاني!

دلوقت الموضوع اختلف، معظمنا بقى يدوّر على الحلول العملية، ده كمان أصبح فيه انفتاح على فكرة أن أهم حاجة في البيت أنه يكون مريح نفسيًا حتى لو هـ نضطر نكسر ثوابت العصور القديمة، الفكرة دي بـ تؤكد عليها تصميمات “باجوا – Bagua” اللي فتح جديد في الزمالك.

مبدئيًا، “باجوا” هي كلمة صينية معناها الحرفي “8 رموز”، ولكن هي اسم لخريطة لونية مكونة من تسع ألوان لو تم توظيفهم من خلال الديكور بشكل صحيح داخل مساحة المنزل أو المكتب، إلخ… المكان هـ يشع طاقة إيجابية وبالتالي هـ يكون تأثيره عليك إيجابي. والخريطة دي هي أحد أهم أدوات مدرسة “فنج شوي” المعمارية، واللي بـ تؤمن بأن الأماكن والمساحات اللي بـ نشغلها لها تأثير مباشر على صحتنا النفسية.

الحقيقة أن أصحاب المكان قدروا يطبقوا نظرية “باجوا” فعليًا في ديكور المحل، لأن بالرغم من مساحته الضيقة جدًا وكمية المعروضات واختلاف ألوانها ونقوشها، إلا أن بمجرد دخولنا حسينا براحة نفسية وبهجة. أول شيء لفت نظرنا كان مرآة بيضاوية طويلة لها إطار ومسند خشبي لونه تركواز (1600 جنيه)، ومجموعة من الكراسي المختلفة في الحجم والشكل، بـ يجمع ما بينهم طرازهم العتيق واللي أضافوا إليه نوع من البوهيمية بتنجيد القاعدة بقماش منقوش من نوعية “الباتش وورك”. نفس القماش مستخدم في مجموعة من الخداديات، وسعرها (190 جنيه) للواحدة، أما لو قطيفة أو قطن فسعرها (160 جنيه).

الرفوف الأعلى موجود عليها مجموعة من الأباجورات الفخارية والزجاجية، بالرغم من ألوانها القاتمة، إلا أنها متماشية مع قماش الشابوهات المليء بالتفاصيل، ولازم نوضح أن الأباجورة نفسها لها سعر غير سعر الشابوه. أبهرتنا مجموعة قصاري الزرع الفخارية اللامعة، واللي بـ تتفاوت في الحجم، أصغر حجم منها سعره (30 جنيه)، وكمان أباريق من نفس الخامة سعرها (100 جنيه).

لاحظنا عرض مجموعة من الأطباق الزجاجية المميزة بالنقوشات العتيقة، واللي أول ما مسكناها اكتشفنا أنها من مادة الميلامين، الأحجام مختلفة وأسعارها بـ تبدأ من 60 حتى 150 جنيه. نفس النقوش العتيقة دي معمول منها “مسّاكات مطبخ” وسعرها (60 جنيه).

يمكن “باجوا” ما يكونش المكان المعتاد اللي ممكن تشتري منه كل حاجة محتاجها في بيتك، إلا أننا متأكدين أنه تأثيث ولو غرفة واحدة في بيتك منه ممكن يعمل فرق كبير ومبهج في الوقت نفسه.