The Definitive Guide to Living in the Capital , Cairo , Egypt

تسوق
بادوفا

بادوڤا: أحذية حريمي بأسعار مغرية في مصر الجديدة

  • 37 شارع الخليفة المأمون
  • أحذية
تم التقييم بواسطة
Waleed Abuarab
قيم
قيم الآن
بادوڤا: أحذية حريمي بأسعار مغرية في مصر الجديدة

في نهاية شارع الخليفة المأمون من ناحية روكسي فيه عدد كبير من محلات الأحذية الحريمي والإكسسوارات علشان تطبق العادة المصرية الشهيرة لما يفتح محل بـ يبيع حاجة معينة وتلاقي بعد كده كل محل بـ يفتح جنبه بـ يبيع نفس الحاجة، ومع الوقت تتحول المنطقة لسوق كبير وأحيانًا متخصص في بضاعة بعينها. تقريبًا هو ده الوضع حاليًا في ميدان روكسي من ناحية شارع الخليفة المأمون واللي بقى مقصد بنات وسيدات كثير بـ يروحوا يتفرجوا على محلات الإكسسوارات اللي هناك، وإحنا لما قررنا نكتب عن محل «بادوڤا» الموجود هناك ما كناش قاصدين المحل بعينه بقدر ما كنا قاصدين نلفت النظر للمربع ده اللي فيه العدد الكبير ده من محلات الأحذية الحريمي زي «كلوب ألدو» و«سورس» و«الجباس» وغيرها، وتقريبًا كلها بـ تقدم نفس الموديلات والأسعار قريبة من بعض جدًا، والاختلاف بـ يبقى في كام موديل زيادة في كل محل، لكن التنوع موجود في كل المحلات والأسعار مغرية بالمقارنة بمحلات الأحذية اللي بـ تبقى داخل المولات والماركات المعروفة اللي أسعارها بـ تبقى مرعبة ومستفزة جدًا، لأن مهما كانت الجودة أو حداثة الموديل في الأحذية الحريمي بالذات، الموضة بتاعته بـ تتغير بسرعة والبنت تلاقي نفسها مش قادرة تلبس نفس الجزمة فترة طويلة، علشان كده بـ نعتبر الحذاء الرخيص أسلم وأوقع.

محل «بادوڤا» مساحته صغيرة لكن مرتب والمعروضات على كل جدران المحل مرصوصة بشكل أنيق، والإضاءة البيضاء الشديدة المميزة لكل محلات الأحذية بـ تخلينا نتفرج بنِفس واستمتاع على كل المعروضات، والخدمة ودودة بس من بعيد لبعيد زي ما إحنا بـ نحب، وأخذنا راحتنا وإحنا بـ نتجول بين الأرفف اللي عليها عدد كبير من الأحذية والصندل والسابو والباليرينة والشبشب وبعض الموديلات اللي شبه الكوتشي. لاحظنا أن معظم المعروضات في المحل صناعة محلية إلا موديلات محددة موظف البيع قال لنا أنها مستوردة، وكانت المشكلة أن المقاسات بـ تبدا من 37 بالذات في المعروضات المحلية، ولو عاوز أقل من 37 يبقى لازم تدور في المستورد، وطبعًا كان فيه ندرة كبيرة في المقاسات الصغيرة وكان البديل أننا ندور على المقاس الأكبر لكن بـ “قالب” أصغر أو بأكثر من رباط وابزيم علشان نضيقه ويوصل للمقاش اللي إحنا عاوزينه.

الصنادل هي المسيطرة على الموديلات الجديدة خاصة اللي بسير واحد من الأمام بالألوان الذهبي والبرتقالي، وبشكل عام الألوان الذهبي والبرتقالي والأخضر موجودين بقوة في كل موديلات صيف 2013 وفيه عدد من السابوهات بشبكات خشبية زي الخوص من الأمام شكلها ظريف قوي، وعجبنا موديلات فلات خالص على الأرض بتوكة من الخيوط الذهبية من الأمام وعدد من الباليرينات اللي شبه الشوز الإيطالي التقليدي للرجال لكن بفيونكات وتصميمات رقيقة وشكلها جديد ومش تقليدي خالص. الأسعار كلها بـ تبدأ من 80 لحد 120 جنيه، نادرًا لما تلاقي حاجة أكثر أو أقل، والشنط الجلدية والقماشية كمان بنفس متوسط الأسعار. «بادوڤا» “اللي على اسم مدينة إيطالية صغيرة” فيه موديلات حلوة، هاتيها من هنا أحسن ما تدفعي 5 أضعاف في نفس الموديل في مكان ثاني وتركنيها بعد نهاية الموسم.

نصيحة 360

المحل له فروع في الهرم وشارع الميرغني.

أحسن حاجة

أسعار جيدة لموديلات أنيقة بجودة مقبولة.

أسوأ حاجة

مشكلة المقاسات الصغيرة اللي مش موجودة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح