The Definitive Guide to Living in the Capital , Cairo , Egypt

برونتو شوز

برونتو: أحذية رجالي بأذواق متنوعة في مصر الجديدة

  • 1 شارع ابراهيم اللقاني
  • أحذية
  • 0224544495
تم التقييم بواسطة
Waleed Abuarab
قيم
قيم الآن
برونتو: أحذية رجالي بأذواق متنوعة في مصر الجديدة

اسم معروف في في عالم التسوق الرجالي في القاهرة، أحذية «برونتو» بقى لها أكثر من 10 سنين محافظة على مكانة جيدة بين محلات الأحذية محلية الصنع في مصر، وبعد ما كنا بـ نشوف منتجاتها في محلات «زلط» و«لطفي» وغيرها، أصبح لها فروع كثيرة منتشرة في أهم الشوارع التجارية وفي أكبر المولات وأحدثها كان الموجود صن سيتي مول بالقرب من مطار القاهرة.

زرنا الفرع الأشهر الموجود في شارع إبراهيم اللقاني في ميدان روكسي، على نفس الصف بتاع “شاورما أبو حيدر”، موقع جيد للمحل وواخد ناصية مميزة وله يافطة مضيئة باللون الأحمر. صحيح المحل من الداخل مساحته صغيرة، لكن فيه تنوع كبير في المعروضات، كلها أحذية رجالي، كلاسيك عادية وكاجوال وفيه بعض الموديلات الأقرب للكوتشي والكونفرس، وفيه أحزمة ومحافظ من الجلد الطبيعي وشوية إكسسوارات ثانية.

معظم المعروضات عليها علامة Pronto مكتوبة على الحواف وعلى نعل الأحذية من تحت، بـ يعجبنا ثقته في العلامة التجارية الخاصة به واعتزازه بها، صحيح مش كل الموديلات من تصميماته لكن فيه تصميمات محلية كويسة بجانب التصميمات الإيطالية والعالمية اللي بـ تتصنع هنا في مصر، وبـ يتم استخدام أنواع وخامات مختلفة من الجلود زي الجلد المجذع والجلد المقلوب واللميع العادي للأحذية الڤيرنيه والكلاسيك الخاصة بالمناسبات. وفيه بعض الموديلات اللي بـ يُقال عليها “موكاسان” بـ تبقى قطيفة بالألوان الأسود والبني والبندقي.

الأسعار للأحذية الكلاسيكية بـ تبقى من 160 لحد 220 جنيه، المقاسات بـ تبدأ من 40 لحد 46 وأحيانًا أكثر، هـ تلاقي كل الموديلات المناسبة للأفراح والملابس الرسمية وموديلات بسيطة للتمشية وتنفع تتلبس على الجينز. لكن التنويعة الأكبر والأحلى كانت في الموديلات الكاجوال طبعًا، بالذات اللون البني بدرجاته والجلد المقلوب هنا مميز جدًا، فيه موديل عجبنا مش عليه أي نقشات وشكله بسيط وتقليدي جدًا وكانت بـ 290 جنيه. فيه عدد من “الموكاسان” الفلات بكل الألوان تقريبًا بأسعار 200 جنيه وفيه كام موديل من الأحذية الإيطالية ماركة DB العالمية، للأسف هي تقليد ومتقفلة في الصين زي ما فهمنا، لكن تقليد كويس جدًا ومش هـ تعرف تطلع منه أي عيب صناعة، الموديلات دي سعرها من 400 لـ 450 جنيه وهي الأغلى في المحل والأشيك كمان، وفيه منها بجانب الألوان الأسود والبني التقليديين فيه الأزرق والرصاصي.

الحزام الجلد بـ 106 جنيه بالضبط، وفيه محافظ وجوارب رجالي وسبراي تنظيف وورنيش للأحذية، ميزة «برونتو» هي التخصص الدقيق، ومستوى الخدمة الجيد، العاملين هنا فاهمين شغلهم كويس وإن كنا لاحظنا بعض المستجدين اللي محتاجين مساعدة من مدرائهم طوال الوقت. «برونتو» اختيار جيد لما تكون بـ تدور على “جزمة” زي الكتاب ما بـ يقول، تؤدي الغرض بعيدًا عن الماركات والاختراعات.

نصيحة 360

بشكل عام، اللون البني هنا أحسن من الأسود.

أحسن حاجة

طبعًا التخصص، أحذية رجالي وبس.

أسوأ حاجة

ما ينفعش يبقى فيه موديلات مقلدة بـ 450 جنيه!

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح