The Definitive Guide to Living in the Capital , Cairo , Egypt

زمان لما الواحد كان بـ يحب يقرأ كتب كثير، سواء كتب نادرة أو قديمة أو حتى كتب جديدة، كان أمامه خيارين: يا إما يروح مكتبة عامة أو سوق الأزبكية، ده طبعًا قبل معرض الكتاب وخصوماته وعروضه اللي كنا بـ نستناها من السنة للسنة.

أما دلوقت المكتبات الحديثة اللي بقيت بـ توفر لك كل حاجة سواء قديمة أو حديثة بأسعار معقولة وجودة تحفة وطوال السنة لا أنت مضطر تستعير كتاب وتدفع غرامة تأخير لما يقعد معاك شوية، ولا تفضل على أحر من الجمر بـ تحوش لحد ما معرض الكتاب ييجي.

تعرف على الفائزين في جوائز اختيارات المحررين لأفضل المكتبات لعام 2015:

 

مكتبة ديوان – Diwan Bookstore :

بظهورها قدرت أنها تسهّل حياة أي شخص "دودة كتاب" في القاهرة؛ لأنها مش بس عندها كم رهيب من الكتب المتنوعة في كل المجالات، ده كمان ممكن تعمل أوردر لكتاب ييجي لك من بره مصر ومن غير أي مصاريف إضافية.

 

الكتب خان – Al Kotob Khan:

من أول الكلاسيكيات حتى الكتب المعاصرة والأدوات المكتبية كمان، الكتب خان قدر في وقت قياسي أنه يكون من أهم الأماكن المتخصصة في بيع الكتب في القاهرة.

 

مكتبة مكتوب – Maktoob Bookstore:

مكتبة مكتوب تعتبر كنز لأي شخص بـ يحب القراءة، وخصوصًا لو بـ يقدر الكتب المستعملة، لأن مكتوب عندها مجموعة كبيرة من الكتب المستعملة في مختلف المجالات واللي أسعارها بـ تبدأ من 2.5 جنيه، ده غير أنها كمان بـ تقدم نظم مختلفة لاستعارة الكتب.

 

لينرت & لاندروك – Lehnert & Landrock:

المكتبة نفسها كتاب في حد ذاتها، لينرت & لاندروك تعتبر قصة حياة أصحابها اللي تنقلوا بين بلاد كثيرة والمتجسدة في مجموعة الصور الفوتوغرافية المعروضة في المكتبة، ده غير مجموعة الكتب المختلفة اللي المكتبة بـ تعرضها.

 

مكتبة أ – Alef Bookstore:

مكتبة أ مش بس قدرت توصل لمحبي القراءة في مختلف المحافظات بكم كبير من الفروع، دي كمان بـ تقيم على مدار الشهر فعاليات وحفلات توقيع كثيرة لأحدث إصدارات كبار الكتاب.

 

مكتبة الشروق – Shorouk Bookstore:

المكتبة التابعة لأشهر دار نشر في القاهرة –دار الشروق- بـ تمتاز أنها منتشرة في كل مناطق القاهرة، زائد أنها على طول فيها أحدث الإصدارات العربية والعالمية لكبار الكتاب.

 

مكتبة صوفي – Sufi Bookstore:

مكتبة لها طابع مختلف بجوها الشرقي العتيق، ده غير أنك هـ تلاقي مكان تأخذ فيه قهوتك وأنت بـ تقرأ كتابك المفضل، وبـ يعملوا حفلات كل فترة، يعني من الآخر تجربة مختلفة لمحبي القراءة. 

 

كريبتوناينت – Kryptonite:

ده المكان اللي ممكن يفرح أي شخص بـ يعشق الكوميكس وأبطاله الخارقين، لأنه بـ يجمع عدد مهول من المجلات والألعاب اللي لها علاقة بالعالم ده وأبطاله.

 

بلاي أند تريد – Play N trade:

"بلاي أند تريد" عارف أن فيه عدد كبير من أهل القاهرة غاويين ألعاب إلكترونية، وبالتالي عنده كثير من الألعاب اللي بـ تناسب جميع الأذواق وجميع أنواع الأجهزة الموجودة على الساحة حاليًا، حرفيًا ده المكان اللي بـ يقدر اللعبة الحلوة.