The Definitive Guide to Living in the Capital , Cairo , Egypt

رنا شرف

فاكرين زمان لما كنا نلاقي في كل بيت كولونيا خمس خمسات؟ الريحة المميزة بالليمون واللافندر اللي ماحدش كان يقدر يستغنى عنها؟ أو بودرة الأطفال اللي كانت دايمًا في كل شنطة بيبي؟ وكمان حنة الشعر الحمرا اللي كانت دايمًا الاختيار الأول؟ البراند ده مش مجرد ذكريات؛ ده حكاية نجاح مصري بدأ من سنين ولسه مكمل وبقوة.

بداية الحكاية

شركة “أنطوان قديس وشركاه”، اللي أسسها الصيدلي أنطوان قديس موسى سنة 1969، هي اللي وراء علامة “خمس خمسات”. من البداية كانت الشركة مهتمة بجودة منتجاتها وإرضاء عملاءها. ومع مرور السنين، الجيل الثاني للشركة استلم الراية، وطوروا البراند عشان يواكب احتياجات المستهلكين اللي بتتغير بسرعة سواء في مصر أو براها.

منتجات خمس خمسات القديمة والجديدة

الحنّة مثلًا، مش بس الحمرا اللي كلنا عارفينها. دلوقتي عندهم ألوان تانية زي الأسود، البني الغامق، النحاسي، والأحمر. وكمان بيوفروا حنة معالجة للشعر بمكونات زي السدر والكشيا، اللي بقوا تريند دلوقتي. والأسعار؟ بتبدأ من 40 جنيه بس!

مش بس كده، عندهم زيوت طبيعية للشعر زي زيت الجوجوبا، زيت اللوز الحلو، وزيت الجرجير اللي بيغذوا الشعر وبيحافظوا عليه صحي ولامع.

أما لو بنتكلم عن الصابون، فخط الإنتاج مميز جدًا. عندهم صابون جلسرين بزيت الأرجان، اللي بيقاوم البكتيريا والالتهابات، وصابون بالكبريت اللي مفيد للبشرة. والأسعار مناسبة جدًا، الصابونة بـ 25 جنيه.

الكولونيا والبادي ميست

الكولونيا المميزة لسه موجودة، وبأسعار بتبدأ من 40 جنيه وبروائح متعددة زي اللافندر والليمون. وكمان بادي ميست بأسعار 140 جنيه، يعني جودة وسعر على قد الإيد.

منتجات الأطفال

خمس خمسات مهتمة كمان بالجيل الجديد، عندهم خط إنتاج خاص بالأطفال بأسعار تبدأ من 10 جنيه! بودرة أطفال، بيبرونات، شاور للأطفال، وكريمات كلها بجودة عالية وسعر معقول.

مقر ثابت للبراند

لو عايز تشوف كل منتجات “خمس خمسات” في مكان واحد، تقدر تروح مقرهم في شارع رمسيس، عمارة 127، الدور الأول، جنب مسجد الفتح. هناك هتلاقي كل حاجة من أول الكولونيا لحد منتجات العناية بالشعر والبشرة.

براند مصري بيفكرنا بالماضي ومكمل مع المستقبل

“خمس خمسات” مش مجرد براند قديم؛ ده اسم كبير قدر يحافظ على مكانته ويطور نفسه عشان يفضل قريب من كل الأجيال. منتجاتهم بتجمع بين الجودة، السعر المناسب، وتنوع الخيارات. لو حابين تعرفوا أكتر، زوروا موقعهم الرسمي:
اضغط هنا لمعرفة المزيد

حافظوا على جمالكم مع براند بيفكرنا بالماضي وبيستعد للمستقبل.