The Definitive Guide to Living in the Capital , Cairo , Egypt

دليل كايرو 360 لشراء لبس عيد رخيص للبنات أونلاين

دليل كايرو 360 لشراء لبس عيد رخيص للبنات أونلاين
written by
Nagla Ashraf

التسوق.. وما أدراك سحر الكلمة دي عند أي بنت، سواء زعلانة أو فرحانة أو زهقانة مافيش أحسن من أنك تقول لها" "يلا بنا ننزل نشتري" وهي مش هـ تكمل تركيز في باقي الجملة، المهم مبدأ "الشراء"، وهـ تلاقيها ابتسمت ابتسامة معروفة كده، وبهجة غير طبيعية انتشرت في المكان، نيجي بس للمشكلة اللي بـ تواجه أغلب البنات وهي الذوق الخاص بها والسعر، لأنها بـ تكون محتاجة تشتري حاجات كثيرة وبجودة كويسة وسعر معقول.

ونحب نبشركم أن المشكلتين دول اتحلوا خلاص، لأن في الفترة الأخيرة انتشرت صفحات التسوق أونلاين، كل ما يخطر على بالك ممكن تشوفيه وتعرفى سعره وتسألى على المقاس المتوفر من وأنت في البيت، ما عليك إلا أنك تطلبى الطلب وييجي لك لحد عندك، ولو أنتِ بـ تحبى تقيسي قبل ما تشتري فيه أماكن عندهم محلات تقدروا تجربوا فيها اللي تحبوه بعد ما تشوفوه على صفحتهم على الفيسبوك، وتختاروا اللي يناسب ذوقكم وميزانيتكم، وبمناسبة العيد كثير من الصفحات دي نزلت موديلات جديدة وعصرية بأسعار حلوة جدًا، على عكس المتوقع أن في الوقت ده بـ تلاقي أذواق مش حلوة في المحلات وبـ تضطري تستني لبعد العيد علشان تشتري حاجة حلوة.

 

Prude and Style:

له محل في مصر الجديدة، عملوه مجموعة بنات عاوزين ينشروا فكرة الحجاب الشيك، اللي مش ضيق وشكله أنيق، ممكن تختاري من عنده اللي تحبيه بعد ما تشوفي صفحتهم على الفيسبوك، وأجمل حاجة في الصفحة دي أولًا أسعارهم معقولة جدًا، ثانيًا لبسهم ذوقه حلو قوي ولكل المناسبات سواء لمناسبة بعد الظهر أو للصيف عامة، أو حتى لبس رسمي، أكثر حاجة عجبتنا عندهم الفساتين والكيمونو والجيبات، سعر القطعة الواحدة بحوالى 200 جنيه ممكن أقل أو أكثر حاجة بسيطة على حسب اختيارك، وكمان عندهم إيشاربات قطن تناسب اللي هـ تشتريه.

 

Chic and Prude:

في مدينة نصر، برضه نفس فكرة الحجاب الشيك، وعندهم مجموعة من الفساتين حلوة جدًا، والجيبات والقمصان، واللي بـ يتميزوا بعباياتهم الفلكورية وكمان فساتين سادة من كل الألوان وتنفع لأكثر من مناسبة بتعديلات خفيفة. غير الكيمونو والكرديجان اللي مختلفين جدًا وحلوين قوي.

 

Dressez.com27:

دول مكانهم في إسكندرية للأسف، بس بـ يوصلوا لك في أي مكان في مصر، مجرد بـ تبعتي رسالة فيها اسمك وعنوانك بالضبط وصورة الحاجة اللي أنتِ عاوزة تشتريها بالمقاس بتاعها، وهـ تلاقي عندهم أجمل تشكيلة فساتين شوفناها فعلًا بلا مبالغة، ممكن تكون الأسعار أغلى هنا شوية، بس الذوق مش هـ تلاقوه في أي مكان ثاني، ودي ميزة طبعًا.

 

Hajab for jupes & skirts:

برضه الطلب أونلاين، ودول بـ يتميزوا بأنهم عندهم تشكيلة كبيرة من الأقمشة سواء للجيبات أو للفساتين وبأسعار حلوة، كمان عندهم قمصان جينز وجاكيتات خفيفة، تقدروا تتابعوا كل الأشكال والأذواق من على صفحتهم على الفيسبوك.

 

Jupes – Skirts:

نفس فكرة الطلب أونلاين، وهم عندهم تنوع كبير في منتجاتهم، هـ تلاقوا عندهم شنط وساعات، بجانب الفساتين والجاكيتات والجيبات، حاجة كده "ما يطلبه المستهلكون"، ولازم الطقم يكمل مع شنطته.

 

Great Skirts:

غير أنك ممكن تطلبي أونلاين، هم بـ يعملوا معارض كل فترة في منطقة معينة تابعي صفحتهم، وروحيها هـ تستمتعي جدًا، لأنهم مش بس بـ يبيعوا شنط وجيبات وقمصان وجاكيتات، دول كمان بـ يعملوا إكسسوارات وتيجان من ورد، فما تفوتيش الفرصة عليكي.

 

Skirts 65 L.E only:

دول برضه بـ يوفروا لك كل الأشكال اللي تحبيها في الجيبات، بس أسعارهم مافيش أرخص من كده، وبـ تطلبي الشكل اللي يعجبك ويوصل لك لحد البيت، والمفاجأة بقى أن سعر الجيبة الواحدة بـ 65 جنيه (يا بلاش)، وده يخليكي تشتري أكثر من واحدة علشان تعيدي براحتك.

 

وأخيرًا يا بنات ما تنسوش تبقوا تطلعوا من لبسكم القديم حاجة للمحتاجين، بس تكون كويسة لا مقطعة ولا دايبة، زي ما تحبوا تلبسوها، وربنا يبارك في اللبس الجديد، وكل سنة وأنت طيبين!

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح