The Definitive Guide to Living in the Capital , Cairo , Egypt

دنيانا – Donyana

دنيانا: مكتبة حيث الأسعار المبالغ فيها في الزمالك

  • 11 شارع حسن صبري - الزمالك
  • 027366918
تم التقييم بواسطة
Dina Mokhtar
قيم
قيم الآن
دنيانا: مكتبة حيث الأسعار المبالغ فيها في الزمالك

نعتقد أن آخر مكتبة –متخصصة في بيع الكتب- فتحت قبل ديوان كان من حوالي 25 سنة على الأقل، استمرارها بالرغم من فترة الركود الأدبي والفكري اللي ساد في التسعينيات بالنسبة للبعض يُعد معجزة، إنما هي لا معجزة ولا حاجة… المسألة كلها أن المكتبات المعدودة على أصابع اليد الواحدة واللي مقرها الرسمي وسط البلد معظمها تابع لجهة حكومية، وبالتالي حتى لو بـ تحقق هامش ربحي بسيط، فأى ربح أحسن من مافيش.

ولكن المثير للاهتمام أن بالتزامن مع افتتاح الفروع الأولى من ديوان، زاد الإقبال على شراء الكتب، ده كمان تعددت دور النشر، وأصبح فيه مجال مفتوح لكل المبدعين والمفكرين من كل الاتجاهات. بعد فترة افتتاحات مكتبية متعددة، أصبحت فكرة وجود المكتبة في أي مكان في القاهرة رائجة ومقبولة، بل ومهمة جدًا لهواة القراءة، “دنيانا – Donyana” واحدة من المكتبات اللي فتحت جديد في الزمالك.

مبدئيًا موقع المكتبة صعب الوصول إليه بالصدفة البحتة، ده لأنها مختفية في الركن البعيد الهادئ بالدور الثاني داخل دجلة سنتر، واللي نفسه متطرف عن المناطق المأهولة بالكائنات الزمالكوية اللي بـ تيجي الزمالك لمجرد الاستمتاع بالجو العام للمكان. لو أنت شخصيًا زملكاوي قديم هـ تكتشف أنك ما دخلتش المكان ده مرتين على بعض في حياتك. عرفنا المكتبة عن طريق صفحتهم على الفيسبوك، والحقيقة أن جمال الصور والمنتجات حمسنا أننا نروح نستكشف المكان، ونشوف الناس دي عاوزة تقول إيه.

أمام المدخل الزجاجي مجموعة كراسي وترابيزة عليها أقلام تلوين وأوراق مخصصة للأطفال، تقدر تترك أطفالك يتفننوا براحتهم أثناء القيام بجولتك بالداخل. المكان مساحته صغيرة جدًا فالجولة عمومًا مش هـ تطول، وهو مُقسم لجزئين: على يسارك الأدوات المكتبية والمدرسية، وعلى يمينك الكتب. افتتحنا الجولة بالأدوات المدرسية، أول شيء لاحظناه كانت حافظة أقلام من القماش، بسيطة جدًا وبلا أي ابتكار، سعرها كام؟ (150 جنيه)، لوهلة ما صدقناش الرقم وقلنا أكيد فيه خطأ ما، ولكن بعد ما شوفنا سعر شنطة متناهية الصغر، تنفع لطفل في الحضانة، لأنها -بشوية حكمة وذكاء في الترتيب من الأم- لا تتحمل أكثر من كراسة وساندويتش وسعرها (380 جنيه)!

بعد كده اتجهنا نحو مجموعة الألعاب التعليمية وأسعارها بـ تبدأ من (200 جنيه).. هو التعليم حلو بس مش للدرجة دي، ماله التعليم المجاني؟! انتقلنا لمنطقة المراهقين، وركن كامل لهواة سماع الموسيقى في أي مكان، ومجموعة متنوعة من سماعات الأذن، وأغطية الموبايل. الركن اللي بجانبه احتوى على مجموعة من المذكرات المصممة خصيصًا لموضوعات معينة في حياتك زي “100 حاجة لازم أعملها قبل ما أموت” وأشياء من هذا القبيل، وهي بالإنجليزية وسعرها (140: 180 جنيه)، لاقينا جدول لسطح المكتب تكتب فيه الأكل اللي أكلته طوال اليوم (80 جنيه). الركن الأخير كان خاص بماركة الأدوات المكتبية المشهورة “Staedtler” ومعروض لها مجموعة كبيرة من الأقلام والألوان، من ضمن المعروضات برجل (99 جنيه) سعره كده ليه؟ لأن مرسوم عليه جماجم وحاجات بـ تهاجم!

أكتفينا من الركن ده، وانتقلنا للكتب، من العربي موجود الـ Best Sellers كلها فقط، وبنفس أسعار المكتبات الأخرى، لكن الأغلبية العظمى لكتب اللغة الإنجليزية، واللي فيها تنوع: من أول التنمية البشرية، والكلاسيكيات والروايات المعاصرة وحتى الـ Self–Help.

قبل ما نختتم كلامنا، لازم نقول أن الشخص اللي ساعدنا في المحل كان لطيف وبجد فاهم هو بـ يعمل إيه. المكان فاتح من شهر ونصف، والأيجار أكيد سعره مرتفع، لكن حقيقي لازم يلاحظوا أن الأسعار مبالغ فيها جدًا، حتى لو بـ تخاطب فئة معينة.

نصيحة 360

المكتبة بـ تبيع أثاث مكتبي للأطفال.

أحسن حاجة

المكان مهندم ومريح للأعصاب.

أسوأ حاجة

الأسعار مبالغ فيها جدًا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح