The Definitive Guide to Living in the Capital , Cairo , Egypt

"محلّي" هو أجدد إضافة لقائمة طويلة من أماكن الأكل المطرقعة اللى بـ تزيد كل يوم فى المعادى، فكرة المكان هو محل بـ يقدم البقالة والأغذية فى مكان واحد تقدر تشترى منه كل احتياجاتك من منتجات طازجة عضوية مصّنعة محليًا؛ منتجات خالية من الكيماويات والمبيدات، وغنية بالنكهة اللذيذة.

المكان عبارة عن شقة دور أرضى لها باب كبير جدًا، مع حديقة صغيرة فى آخر المكان وشوية ترابيزات، كراسى وفرن بلدى لخبز العيش الطازج كل يوم.

أول ما دخلنا، رحب بنا موظف لطيف جدًا ودخّلنا للمكان بإضاءته القوية، مع قسم البقالة على شمالك، واللى بـ يقدم كل حاجة من الفواكة المجففة والكينوا، للصلصة وأعشاب الكمبوتشا.

على اليمين هـ تلاقى بار ساندويتشات ومطبخ مفتوح، تقدر تعمل الساندويتش على مزاجك فى عيش أسمر طازج أو عيش أبيض، والموظف بـ يسمح لك تجرب كل حاجة فى الأول.

قسم الأغذية مكوّن من لحم فيليه مدخّن وروست بيف، مع بط مسلوق وبروسكيتو، وفراخ مسلوقة ومشوية، جرّبنا البط، الفيليه والروست بيف، وبعدها طلبنا ساندويتشات روست بيف مدخّن (40 جنيه) وفيليه لحم مدخّن (50 جنيه).

قسم التوابل بـ يقدم عالم مميز من النكهات، بعيدًا عن الخضروات والنباتات –اللى تشمل جرجير وريحان– عندهم كمان مربى بصل، وصلصة حارّة، وصلصة باذنجان وفول سودانى، مع خضروات مطحونة، وجبن موتزاريلا طازجة ولبنة بالثوم وحاجات ثانية.

طلبنا الساندويتشين يكونوا من العيش الأبيض، والروست بيف كان عليه خس، ومربى بصل، وموتزاريلا، وبصل وطماطم. طعم الروست بيف المدخّن كان قوى ويختلف عن أى مرّة جربناه فيها فى مصر، وعمل طعم ممتاز مع مربى البصل المسكّرة بطعمها اللذيذ والموتزاريلا الطازجة.

نكهة فيليه اللحم المدخّن كانت أقل من الروست بيف، لكن إضافة الصلصة الحلوة والحارّة، اللبنة بالثوم، الخس والمخلل، قدرت تعمل إضافة هائلة للطعم.

مشكلتنا الوحيدة مع محلّي كانت فى كميات الأكل، لكن إحنا فاهمين السبب. وسط مميزات كثيرة بـ يقدموها للعميل والمنتج، ورغم أن 40 أو 50 جنيه ممكن تحسّه مبالغ فيه نظرًا لحجم الساندويتش الصغير، لكن العميل بـ يستمتع بطعم مميز، والمُنتِج بـ يقدر يحقق عائد أمام مجهوده الكبير فى الحفاظ على مستوى ثابت من النظافة والأكل الطازج.