The Definitive Guide to Living in the Capital , Cairo , Egypt

تسوق

Nine & Beyond: ملابس أنيقة للحوامل والأمهات الجداد أونلاين

Nine & Beyond: ملابس أنيقة للحوامل والأمهات الجداد أونلاين
بواسطة
Shaymaa El Gammal

دايمًا الشخص إللي بـ يبدأ فكرة جديدة في مصر بـ نحب نرفع له القبعة!
دلوقت بقينا نشوف كل يوم جديد في عالم الفاشون خصوصًا بعد ما مواقع التواصل الاجتماعي أصبحت بـ توصل لكل الناس وتحولت لمنصة لكل مصممي الأزياء يعرضوا أفكار جديدة.
لكن ماركة Nine & Beyond شدتنا جدًا لأنها يمكن أول ماركة محلّية في مصر مخصوص للسيدات وقت الحمل ومرحلة ما بعد الولادة، هـ نلاقي ملابس حوامل كثير في المحلات والتوكيلات لكن أغلبها عملي جدًا وكاجوال قوي لدرجة تخليه ممكن يفتقر للأناقة والموضة الجديدة.
مؤسسة الماركة دي "سارة طولان" والفكرة بدأت معاها لما كانت حامل وماما جديدة وكانت مش بـ تلاقي بسهولة ملابس أنيقة للخروج أو للمناسبات، سارة كمان شافت أنه فيه مشكلة في ملابس الحمل الموجودة في التوكيلات وهي أن هدوم الحمل بـ تكون مش مناسبة للاستعمال عادةّ بعد الولادة لأنها بـ تكون إما واسعة جدًا أو مش مناسبة للرضاعة فبـ تضطر الأم تشتري ملابس ثاني بعد الولادة بفتحة من منطقة الصدر علشان الرضاعة الطبيعية، وده العنصر المهم الثاني بخلاف الشياكة إللي بـ تخلي تصميمات سارة طولان مختلفة: أنه الملابس تكون مناسبة من فترة الحمل وتكمّل مع الأم بعد الولادة كمان وده بـ يتحقق عن طريق اللعب على التصميم نفسه والقصات وعلشان كده الـ Brand اسمه Nine and Beyond.

العنصر الثالث المهم والمختلف من وجهة نظرنا هو الخامات المستخدمة، معظم الحاجات اللي بـ تُباع في المحلات بـ تكون قطن أو قطن على ليكرا، سارة طولان عرفت بذكاء تستخدم الخامتين دول مع خامات ثانية علشان توصل لدرجة الأناقة المطلوبة، هـ نلاقي حاجات شيفون وساتان وحرير كمان!

منتجات Nine & Beyond بـ تُباع بشكل رئيسي على موقعهم أونلاين والشحن بـ يكون مجاني لو المشتريات أعلى من 1500 جنيه، وحاليًا فيه تخفيضات على مجموعة ربيع/صيف 2015. متوسط أسعار الملابس على الموقع بـ يبدأ من 350 جنيه وحتى 1200 جنيه للأطقم الكاملة، دي تعتبر أسعار عادية لو قارناها بأسعار الحاجات الـDesigned  لكن غالية نسبيًا لو قارناها بأسعار التوكيلات والمحلات العادية، وده بـ يخلي Nine & Beyond مناسب للناس اللي بـ تحب تلبس حاجة Designed وقطع مميزة مش لأي حد عاوز يلبس هدوم عملية عادية.

تصميمات Nine & Beyond متوفرة كمان في Pop Up Shop قطامية داون تاون وعلى تطبيق Mummy Chit Chat وقريبًا على Slickr. وهـ يتم إطلاق منتج جديد قريبًا جدًا عبارة عن شنطة ممكن الأم تاخدها معاها للمستشفى في الولادة لكن لسه مافيش تفاصيل عن محتوى الشنطة دي وبالنسبة لمجموعة شتاء/ خريف 2016 هـ تكون متوفرة في نوفمبر القادم.

نفسنا الفترة الجاية نشوف خط ملابس كاجول/ عملي/ رياضي شوية مناسب للناس اللي بـ تروح مكاتب تشتغل أو بـ تلعب رياضة أو شخصية Hyper (منطلقة) مع الحفاظ على نفس روح التمييز والشياكة.. كمان عاوزين نشوف حاجات ممكن تتلبس مع سكارف أو حجاب أو الناس اللي بـ تحب تلبس لبس مقفول شوية علشان تكون المجموعة مناسبة لأذواق مختلفة. لاحظنا كمان أن الموديلات مناسبة لناس جسمهم مضبوط، هـ يكون حلو جدًا لو بقى فيه قطع مناسبة للناس اللي وزنها زيادة شوية كمان.

حساب Nine & Beyond على أنستجرام مسلي جدًا، وكمان شوفوا صفحتهم على الفيسبوك.

مقترح