-
عمرو ماكجيفر
-
حركة ومغامرات
-
من الآن
-
عصام نصارعصام نصار
Ahmed Abd El Gawad
أدرينالين:
يعنى إيه الكلمة أصلًا؟ خلونا نعرف أن مادة الأدرينالين هو هرمون بـ يفرزه الجسم تحديدًا من من جزء فوق الكلية وهو ناقل عصبى بـ يخلى الجسم متوتر ومستعد يعمل أى حاجة ورد فعله سريع جدًا وده بـ يتفرز عند مواقف الخطر والتوتر الزائد.
التحذير:
البرنامج بـ يبدأ بـ تحذير أى حد بـ يشوف الحلقة أنه قائم على مجموعة مواقف خطيرة ولكنها مدروسة واللى بـ يقوم بها مجموعة من المحترفين وبطرق سلامة خاصة جدًا، يعنى ما ينفعش تقلدها.
الهدف:
يا ترى إيه الهدف من برنامج بـ يعرض مواقف خطيرة؟ طيب إيه العمل لو الشباب قرروا يقلدوهم؟ طيب موقف صانع البرنامج والقائمين عليه إيه لو أصيب أحد من الشباب؟ طيب تكلفة البرنامج واضح أنها عالية جدًا علشان يوفروا التشويق والسلامة للنجوم اللى هـ يلعبوا معاهم.. طيب فيها إيه لو صرفنا الفلوس دى على برامج توعية وفيها تشويق برضه؟ طيب ما تيجوا نكمل البرنامج مع بعض ونشوف إيه الموضوع؟
البرنامج:
البرنامج بـ يعمل تحدى للضيف فى قدراته وإمكانياته علشان يعرفوا هو قد التحدى ولا لأ.. والبرنامج فيه السائق المشهور "عمرو ماكجيفر" واللى معروف بـ تقديمه لمشاهد العربيات الصعبة جدًا.
الخريطة:
هو فيلم حركة من الآخر، ماكجيفر بـ يقابل الضيف واللى اختاروه فى البداية الفنان عمرو يوسف علشان معروف عنه تقديمه لأفلام ومسلسلات تعتمد على الحركة.. وبـ نشوف دخلته لمكان البرنامج وهو منطقة مفتوحة فيها طرق وبيوت وأماكن لضرب النار وقصة يعنى.. وبعدين بـ يمسكوا الخريطة وبـ تبدأ بمطاردة سيارات وناس بـ تظهر وتختفى وتدريبات علشان يعرف يعمل المهمة.. وإزاى يعمل "180" بالعربية وإزاى يعدى من أضيق شارع فى الدنيا اللى هو على قد العربية بالضبط.. وبعدين فيه قتال واشتباك بالأيدى وفيه ضرب نار "مش حقيقى طبعًا" لكنك فى النهاية لازم توصل للهدف.
الاستفادة:
اللى بـ يحبوا العربيات بالذات والسواقة السريعة هما أكثر ناس هـ يستفيدوا من البرنامج ده لأن عمرو ماكجيفر بـ يشرح حاجات كثير فى طريقة السواقة وإزاى تسوق فى أصعب المواقف، وعمرو بـ يقول أن البرنامج بـ يحكى على الأمان وأن أى ضيف فى البرنامج سلامته فى رقبة ماكجيفر.. من أول اللبس للعربية حتى الانفجارات اللى بـ تحصل كلها متأمنة.
والتصوير بقى موضوع ثانى فى الحلقة دى، لازم نقول قد إيه فيه تركيز على قسم التصوير وتوزيع الكاميرات وطرق لقط الحركات والانفجارات ولازم نقول أن التصوير لازم نرفع له القبعة، البرنامج متعوب فيه قوى وبزيادة وطرق سلامة وتقسيمات وحاجات تم بناؤها وممرات وبيوت وأهداف وكل ده علشان حضرتك تتفرج وتتشوق وتستمتع.. اتفرجوا وقولوا لنا استمتعتم؟