The Definitive Guide to Living in the Capital , Cairo , Egypt

الحقيقة أننا فى بداية متابعتنا لـ “ابن حلال” كان عندنا اعتقاد أن المسلسل هو استثمار لنجاح أفلام محمد رمضان الأخيرة: “قلب الأسد” و”الألمانى” وغيرها من الأفلام اللى كانت كلها ماشية على وتيرة واحدة فى الأداء والأغانى والرقص و.. إلخ.

لكن اللى اكتشفناه بعد متابعتنا للحلقات الأولى، أن فيه اتجاه لخروج محمد رمضان من دائرة أفلام البلطجية، وإن كان لسه محصور فى أداء شخصية الشاب الفقير المهمش اللى ضايعة حقوقه المادية والنفسية والاجتماعية فى مجتمع طاحن وظروف صعبة.

من تأليف حسان دهشان وإخراج إبراهيم فخر وأحمد عبد الله صالح، بـ نشوف قصة أحد الشباب المهمش الضائع، محمد رمضان شاب صعيدي بسيط بـ يحاول يشتغل كنقاش علشان يقدر يصرف على أمه (هالة فاخر) وأخته اللى بـ تعانى من مشكلة تأخر سن الزواج.

شهامة رمضان بـ توقعه فى أكثر من مشكلة، وبـ يصنع أعداء من مجتمع الأغنياء اللى بـ يظهرهم صناع المسلسل فى صورة الأشرار المتحكمين فى مقاليد كل شىء، مع بعض الإسقاط السياسي على قضية مقتل بنت المطربة ليلى غفران اللى هزت المجتمع المصرى من فترة فاتت.

بشكل عام نقدر نقول أن المسلسل كويس كبطولة تليفزيونية أولى لمحمد رمضان، لكن الفكرة أن مجرد الاعتماد على رمضان كممثل وحيد والاستعانة بممثلين أصغر سنًا أو خبرة منه لأداء باقى الأدوار ده شىء بـ يقلل من المستوى الفنى للمسلسل، وطوال الوقت بـ يعطينا إحساس أنه تم الاستسهال فى أسماء الفنانين المشاركين فى المسلسل والاعتماد على الجماهيرية اللى حققها رمضان فى السينما. لكن جماهيرية السينما غير جماهيرية التليفزيون تمامًا، ولازم ننوه على ظهور ريهام سعيد فى أحداث المسلسل، الأمر اللى أصبحت ريهام بـ تكرره فى كثير من المسلسلات، والمشكلة مع ريهام أننا مش بـ نقدر ننسى شغلها الأصلى كمذيعة تليفزيون، ونعتقد أن هى كمان مش قادرة تنسى ده! فبـ تخرج علينا طوال الوقت كـ “ريهام سعيد” مش كممثلة بـ تؤدي دور فى مسلسل!

على صعيد الديكور والموسيقى التصويرية، نقدر نقول أن المسلسل كان متوازن فيما يتعلق بالديكور، ما شوفناش ديكور مصروف عليه ببذخ وفى نفس الوقت ما تسربش عندنا شعور بالبخل الإنتاجي، وده يخلينا نضم الديكور للموسيقى التصويرية ونعطيهم الاثنين درجة “مقبول” متوازنة وغير متحيزة.

“ابن حلال” مسلسل كنا نتوقع أنه يكون أسوأ، لكنه خرج بصورة نهائية أفضل من توقعاتنا، صحيح هو مش أفضل مسلسل فى رمضان، لكن مستواه مقبول، ونتمنى توقعاتنا تخيب فى كثير من المسلسلات اللى منتظرينها بفارغ الصبر.

علشان تعرف مواعيد وقنوات عرض “ابن حلال” زور “دليل كايرو 360 للتليفزيون فى رمضان“.