The Definitive Guide to Living in the Capital , Cairo , Egypt

زمان كان لما الواحد يتذوق الأكل قوى ويعرف تفاصيل الطبخة والبهارات كانوا يقولوا عليه “الأكيل”.. وبعديها بشوية كثير لما الواحد يطحن الأطباق اللى أمامه وحلو على حادق على لحوم وطيور وأرز وعيش.. يقول لك الواد ده “أكيل”.. اختلفت الحاجات وبقى الأكيل.

مافيش شك أن قناة cbc سفرة سحبت السجادة من تحت قناة “فتافيت” لأن تقريبًا كل الشيفات اللى فيها مصريين بزيادة.. “أغلبهم ولاد بلد يعنى” وبـ يعملوا الأكل اللى بـ نعمله.. وتعالوا نتكلم عن برنامج “الأكيل” واحد من أجدد البرامج فى القناة.

الأكيل النسخة الثانية من برنامج “عباسيات” أو أكلات عباس السرية ودى أول حاجة نأخذها عليهم.. لكنه لما بدأ يعمل البرنامج زود شوية اختلافات ومع بعض نحكم يا ترى الاختلاف لصالح مين.

عباس: بـ يلف مطاعم فى البلاد العربية المختلفة منها لبنان وسوريا.

مراد: لحد دلوقت بـ يلف على مطاعم مصر بس.. وما قالش أنه هـ يخرج بره.

عباس: بـ يدخل جوه المطعم ويقعد مع الشيف فى المطبخ ويتعرف على البهارات وسر الصنعة.. وإيه اللى خلاه مشهور.. ويعيد ويزيد فى المقادير وطريقة الطبخ.

مراد: بـ يدخل للشيف وبـ يعرف المقادير لكنه مش بـ يركز عليها قوى.

لكن لازم نقول أن الاثنين بـ يركزوا على فكرة أن الأكل “متعة ولذة” (المعنى القديم للأكيل)وطبعًا ما تزعلوش أنكلامنا بـ يبان هجوم على البرنامج لكن إحنا عملنا ده من دافع الغيرة عليه وأننا عاوزينه يبقى أحسن.

وكمان ممكن نقترح عليهم جنب الاستضافات اللى بـ يعملوها للجمهور -ودى حاجة تحسب لهم- وسؤالهم عن الطعم وإيه أكثر حاجة حبها.. أنهم يسألوا عن المكان وأحلى حاجة فيه.. والخدمة والسعر والمكان هل “استراتيجى” وسهل الوصول إليه ولا صعب.. شكل “قائمة الطعام” وإيه أكثر حاجة مهمة فيها.

المهم أننا كمان محتاجين نعرف المطاعم الكبيرة واللى مش مشهورة قوى فى مصر وأماكنها وده اللى عمله مكرم.

والإضافة الحقيقية فى البرنامج أن مراد مكرم خبرة فى الأكل.. يعنى مش مجرد واحد بـ يدخل المطعم يأكل ويخرج.. ده بـ يهتم بتفاصيل الأكل من وجهة نظره مش من وجهة نظر الشيف.. وبـ يقابل الإدارة وبـ يعتبر ده من أدبيات الزيارة فكرة أنه يقابل صاحب المكان.

ومش هـ ننسى إتيكيت مكرم فى الأكل يعنى مسكته للشوكة والسكينة وبـ يأكل بها حتى السمك -مع أنه صعب- لكن برضه فيه حتة مصرى لما “غمس” بالعيش تتبيلة كانت عاجباه وقال الحتة دى مصرى أصيل.. لكنه فى النهاية دمه خفيف وجدع وفى النهاية بـ يعمل ملخص للحلقة فى رحلته للمكان.