التفاصيل الكاملة لبرنامج رامز بيلعب بالنار
Mostafa Fathi Abdelfadil
"مساء الخير إحنا عاملين تكريم مهم لحضرتك في المغرب، وفيه مقابل مادي كبير مقابل حضورك" دي الجملة المغرية اللي فريق برنامج رامز جلال الجديد "رامز بيلعب بالنار" وظفوا بنت مخصوص صوتها مميز علشان تقولها للنجوم، وبعد ما بتقنعهم بالحضور المقلب بيتم في أحد أبراج الدار البيضا في المغرب.
إيه فكرة المقلب؟
الفكرة باختصار أن النجم لما يوصل المغرب فيه عربية بتاخده مخصوص في موكب فخم لمقر ندوة التكريم المزعومة في أحد أبراج الدار البيضا، وبمجرد دخول النجم للبرج فريق البرنامج بيتجمع حوالين مدير أعماله بحجة "تعالى عايزينك في حاجة على جنب" وبعدها بياخدوا النجم لوحده بعد التخلص من مدير أعماله أو أي حد تاني معاه على أسانسير البرج من غير مدير أعماله، وأثناء الصعود لمقر الندوة بتحصل تفجيرات ونار شديدة بتصيب النجم بحالة رعب، والكاميرات الخفية طبعًا بتوثق كل ده من غير ما النجم يعرف.
وبعدين؟
الطريق الوحيد علشان يتم إنقاذ النجم هو الصعود على سلالم البرج علشان توصله للسطح، بحجة أن في طيارة هليكوبتر هتنقذه، لكن على السلالم هنشوف مقالب كتير منها حاجات بتمنع النجم من الصعود زي كلاب حراسة مثلًا!
في النهاية بيوصل النجم مع فريق الإنقاذ للسطح وبيلاقوا عليها فعلًا طائرة هليكوبتر.. مين الطيار بقى؟ بالضبط هو أخينا رامز جلال.. وكالعادة النجم بينزل فيه ضرب! ويصرخ ويقول "كده كنت هتموتني.. حرام عليك"!
ممكن النجم يموت فعلًا؟
فريق البرنامج بيقول لكايرو 360 أنهم مستحيل يعرضوا حياة أي إنسان لخطر، وأنهم استعانوا بعدد كبير من المتخصصين في الإنقاذ في حالات الطوارئ، وقبل الحلقة ما تبدأ بيتأكدوا من الحالة الصحية للنجم وأنه لا يعاني من أي مشاكل صحية أو أمراض سكر أو قلب، كمان في طبيب متخصص موجود علشان لو حصل أي طارئ.
هل المقالب حقيقية؟
بنسبة كبيرة جدًا المقالب حقيقية، مصدر في البرنامج بيقول لنا أن أغلب النجوم ما كانوش يعرفوا أنه مقلب غير في نهاية المقلب! كمان المطرب اللبناني راغب علامة كتب على حسابه على تويتر أنه ما كنش يعرف أبدًا أنه مقلب وأنه في السنين الأخيرة كان بيرفض يروح أي نشاطات علشان خايف من برنامج رامز جلال لكن المرة دي ضحكوا عليه وأقنعوه فعلًا أنها ندوة. لكن كلمة في ودنك وأوعى تقول لحد: فيه عدد قليل من النجوم كانوا عارفين أنه مقلب بس مش عارفين تفاصيل المقلب نفسه، والسبب أنهم واخدين مبلغ كبير وفريق البرنامج كان خايف بعد المقلب يرفضوا أن البرنامج يذيع حلقتهم، بس عدد النجوم دول قليل مش كبير مقارنة باللي مش عارفين!
مين النجوم؟
بالإضافة لراغب علامة هنشوف أمير كرارة، وعمرو يوسف والمطرب مصطفى كامل وغيرهم من النجوم، لكن اللي مميز فعلًا السنة دي هو أننا هنشوف لأول مرة واحد من نجوم السوشيل ميديا وهو الخليل كوميدي.
هتشوف البرنامج فين؟
كعادة كل برامج رامز جلال اللي بتحتاج تكلفة إنتاج عالية ما تقدرش تدفعها غير إم بي سي مصر، واللي هتعرض البرنامج حصريًا.
مقترح
معالم وسياحة
90 دقيقة من القاهرة.. أجمل 7 أماكن في الفيوم هيغيروا موودك
أجمل أماكن الفيوم الفيوم +4
تسوق
