The Definitive Guide to Living in the Capital , Cairo , Egypt

بما أننا بـ نحترم الابتكار والاختلاف، وبـ نشجعهم باستمرار، يبقى لازم علينا أننا نشجع تجربة الفنان الشاب يوسف الشريف بشكل عام، وتجربته التليفزيونية بشكل خاص اللى استمرت على مدار مسلسلات زى “اسم مؤقت” و”رقم مجهول” واللى تم عرضها فى رمضان الماضى وقبل الماضى.

فى المسلسل الجديد اللى بـ يحمل اسم (الصياد) واللى ألفه عمرو سمير عاطف، وهو ثانى تعاون بين عمرو وبين يوسف الشريف بعد مسلسل رقم مجهول واللى قدر من خلاله عمرو أنه يصطاد المشاهدين بقصة قائمة على التشويق والترقب، بـ نشوف يوسف الشريف فى دور ضابط الشرطة (سيف) واللى بـ تستعين به وزارة الداخلية لفك لغز مقتل مجموعة من الضباط بطريقة واحدة، بـ تعطى إيحاء بتورط مجرم دولى اسمه الكودي الصياد، بـ يتم الاستعانة بخبرات سيف لأنه الوحيد اللى قدر يوقع بالمجرم ده، لكنه فقد نظره خلال العملية، الأمر اللى بـ يخلى الاستعانة بجهوده شيء صعب وضاغط على نفسية الجميع قبل ما يكون ضاغط على خط سير العملية بالكامل.

تمثيل يوسف الشريف بـ يتطور كل يوم، وتملكه من أدواته بـ يزيد مع الوقت، ونقدر نقول أنه أدى دور الكفيف ببساطة وهدوء ودون مبالغة، أحيانًا بـ يسقط فى بعض الغلطات البسيطة زى أنه يمد أيده لملعقة الشاى كأنه شايفها، أو أحيانًا بـ نشوف بعض المبالغات فى السيناريو زى قدرته على التصدي للص بـ يقتحم شقته أو ضربه لرجل في أحد الكافيهات، لكنها مبالغات محمودة، لزوم إظهار البطل بصورة الشخص المثالى القادر على التكيف مع عاهته.

يوسف كمان بـ يظهر بوزن أقل بكثير من وزنه، ومن الواضح أنه خضع لدايت قاسى قبل بداية الدور، يوسف بـ يحاول يفتح سكة جديدة لمستقبله الدرامى والفنى ودى خطوة تحسب له.

دينا فؤاد فى دور المحامية الحقوقية، نقدر نقول أنها ظهرت فى الدور بشكل مستفز جدًا وعصبى، بـ تظهر فى معظم المشاهد وهى بـ تتكلم بعصبية أو بـ تخبط على الترابيزات، نتوقع أن دورها يحتل حجم ومساحة أكبر فى الحلقات القادمة، لكن لو استمرت على نفس أسلوب الأداء وما عملتش أى تحولات جذرية فى الشخصية، للأسف دورها مش هـ يكون ناجح زى ما توقعنا.

الديكور على الرغم من التكلفة الواضحة، إلا أنه ما كانش مقنع فى كثير من الأحيان، على سبيل المثال كان غير مقنع إطلاقًا إظهار وحدة تابعة للداخلية كأنها وحدة تابعة للـ CIA بكمية الإضاءة والديكورات المبالغ فيها، وغرف الاجتماعات الفخمة، وكلنا عارفين الحالة المتدهورة اللى بـ تعانى منها مكاتب الضباط فى الأقسام والمديريات المختلفة.

الموسيقى التصويرية على الرغم من جودتها، إلا أن مسلسلات يوسف الشريف فى رمضان الماضى واللى قبله كانت أقوى وأحلى، ويمكن أفضلها على الإطلاق موسيقى مسلسل رقم مجهول، اللى كان أفضل مسلسل فى رمضان فى رأينا أيامها.

الصياد مش هـ يكون أفضل مسلسلات رمضان السنة دى، لكن هـ يكون واحد من المسلسلات اللى نرشحها للمشاهدة والمتابعة والاهتمام، ومنتظرين جديدك يا يوسف.

علشان تعرف مواعيد وقنوات عرض “الصياد” زور “دليل كايرو 360 للتليفزيون فى رمضان“.