The Definitive Guide to Living in the Capital , Cairo , Egypt

تليفزيون
اللهم تقبل

اللهم تقبل: برنامج ديني بروح دلوقت مع عبلة الكحلاوي فى رمضان

  • د. عبلة الكحلاوىد. عبلة الكحلاوى
  • عائلي
  • من الآن
  • هشام عبد المجيدهشام عبد المجيد
تم التقييم بواسطة
Cairo 360
قيم
قيم الآن
اللهم تقبل: برنامج ديني بروح دلوقت مع عبلة الكحلاوي فى رمضان

شيء غريب جدًا لاحظناه رمضان السنة دي، هو أن البرامج الدينية قليلة جدًا، ومعظم اللي بـ يقدم البرامج دي شباب، ورجالة في الوقت نفسه، زي معز مسعود، ومصطفى حسني، والحبيب على الجفري، لكن أنك تلاقي برنامج لحد كبير وكمان ست، فده أول ميزة من مميزات برنامج “اللهم تقبل” اللى بدأ مع بداية رمضان، واللي كل حاجة فيه حميمية بشكل كبير، بداية من الديكور، لحد أسلوب الدكتورة عبلة الكحلاوي اللي تخطت كونها أستاذة جامعية وداعية دينية لمرحلة أنها تكون أم لكل المصريين تكلمهم زي ما بـ تكلم أولادها، وتنصحهم بنفس درجة الخوف والحب.

اسم البرنامج “اللهم تقبل” هو جزء من آية كريمة، بـ تحاول من خلاله الدكتورة عبلة أنها تدخل الناس في جو رمضان بجد، وتحسسهم بحلاوة الأيام دي، وأنهم يستشعروا نفحات ربنا في الأيام الكريمة، طبعًا مش محتاجين نقول قد إيه أسلوبها كله أمومة، ورغم أن طريقة التقديم والإعداد قديمة شوية، زي كل البرامج الدينية اللي كنا بـ نشوفها من كام سنة، إلا أن محاولات إضافة جديد ما وقفتش على مدى الحلقات، الحلقة الأولى حسستنا أن الموضوع مش هـ يضيف لنا جديد خاصة أنها بـ تحاول تقدم المعلومات من خلال أحاديث وأبيات شعر وآيات قرآنية، من غير ما تفهم المشاهدين إزاي يعملوا ده بطريقة مبتكرة، لكن مع مرور الحلقات بدأنا نلاحظ قد إيه البرنامج مميز وفعلاً بـ يقدم جديد، وهو ربط الدين بالأحداث الجارية.

الناس اللي مقاطعة بعضها بسبب السياسة وما اتصلوش ببعض في رمضان علشان الخلاف، الناس اللي تجرأت على الكبار بدعوى أنهم بـ يفكروا غلط، تكسير ممتلكات الناس، وحرق أملاك الشعب، حلقات كاملة اتكلمت عن الوطن زي الحلقة الرابعة اللي كان عنوانها “الرحمة بالأوطان”، واللي ردت فيها الدكتورة عبلة على جملة شهيرة بـ يرددها البعض عن أن “الوطن حفنة تراب عفن”.

مع مرور الحلقات بدأت الدكتورة عبلة تعرض قصص مؤثرة وحية، زي تاجر المخدرات اللي تاب بسبب أولاده، والبنت اللي أخطأت مع واحد ومن خلال قصتها بـ يتم البحث عن مين الغلطان، هل البنت لوحدها ولا لأ، وقصة السيدة الألمانية اللي بكيت لما سمعت الآذان وهي ما تعرفش لغة عربية.

 من خلال “اللهم تقبل” الدكتورة عبلة بـ تحاول ترد الناس مرة ثانية لروح رمضان اللي غابت عن كثير مننا، بـ تحاول تفهم الناس أن الشهر الكريم مش أكل كثير، وعزائم ومسلسلات وسهر للصبح وحفلات، كل ده بصوتها المميز ونبرتها اللي كلها أمومة، الحلقة مدتها 32 دقيقة، وأبرز كلمة فيها هي “يا حبايبي” اللي بـ تحرص عليها الدكتورة عبلة.

 

 علشان تعرف مواعيد وقنوات عرض “اللهم تقبل” زور “دليل كايرو 360 للتليفزيون فى رمضان“.

عجبك ؟ جرب

"خطوات الشيطان"، و"لحظة سكون".

نصيحة 360

الدكتور عبلة الكحلاوي داعية دينية مميزة فعلاً، مش بـ تتكلم وخلاص زي دعاة كثير، أسست جمعية خيرية في المقطم لرعاية الأطفال الأيتام ومرضى السرطان والمرضى من كبار السن اللى بـ يعانوا من مرض الزهايمر تحت اسم "جمعية الباقيات الصالحات"، ده مش أول برنامج ديني تقدمه، وناس كثير بـ تنتظر برامجها نظرًا للطريقة الحميمية اللي بـ تقدمها بها.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح