The Definitive Guide to Living in the Capital , Cairo , Egypt

تليفزيون
المطلقات

المطلقات: مسلسل بعيد عن السامعين على قناة Ten

  • أحمد صبحى
  • دراما
  • من الآن
  • محمد الرشيدىمحمد الرشيدى
تم التقييم بواسطة
Rasha Zeidan
قيم
قيم الآن
المطلقات: مسلسل بعيد عن السامعين على قناة Ten

تبدأ الحلقة الأولى بصورة لكوبري قصر النيل علامة على أننا في القاهرة.. وعلا غانم بـ تلم شنطة هدومها وشكلها متضايق جدًا، والدخلة بقى في أول الكلام لها وردها على أمها اللي بـ تقول لها: "مش هـ تسافري يعني مش هـ تسافري".

ترد: "عايزيني أقعد؟.. تمام… قولي للناس تسيبني في حالي.. انزلي خبطي على شقة شقة وقولي لهم سيبوني في حالي.. قولي للناس تبطل تبص لي نظرة كده ولا كده احترم نفسك.. تنزلي لكل واحد بـ يتكلم عني وقولي له اخرص".

وتسافر دينا المطلقة إسكندرية علشان تشوف حياة جديدة، والمسلسل بـ يناقش فكرة صعبة لشريحة كبيرة في المجتمع.

أصعب حاجة في الدنيا الوحدة.. أنك ما تلاقيش حد تتكلم معاه، تفضفض له أو حتى تتخانق معاه، علشان كده كل واحد فينا بـ يدور على نصه الثاني، وكل واحد فاكر نفسه حكم وقاضي، بـ يحاول يحكم على اللي أمامه وخلاص، وخد عندك بقى بالنسبة للمطلقة لازم نبص لها على أنها في الغالب "مش محترمة" أو زي ما بـ يقول الشباب "صيدة سهلة" والهمسات تشتغل عليها خاصة من الجيران والنظرات اللي من تحت لتحت.. وكمان مشكلة الأهل اللي أول ما يحصل معاهم حاجة أو مشكلة لازم تقول الأم أو الأب لبنتهم: "أنت مش عارفة أنت إيه.. أنتي مطلقة" وكأن دي نهاية العالم بالنسبة للبنت.

الشخصيات الأربعة الأساسية في المسلسل بـ يسيطر عليها الكآبة علشان مطلقات: علا غانم جوازتها جاءت غلط أصلًا لأنها افتكرت العريس "لُقطة" ما يتعوضش يعني ولازم تتجوزه وعلشان والدها متوفي وما عندهاش خبرة هي ولا مامتها اتجوزته وطلع الموضوع على فاشوش.. واتطلقت، وهي بقى البنت العنيدة.

مي كساب هي الشخصية الهادية الحنينة والزعلانة أغلب الأوقات واللي بـ تشتاق دايمًا كده.. ميرهان حسين شخصية جميلة بـ تحاول توقع الشاب الغني علشان تتجوزه وما عندهاش أ مؤهلات غير أنها البنوتة الرقيقة.. مي سليم بـ تعمل شخصية جديدة عليها خالص وهي الصعيدية المحجبة اللي جاءت الإسكندرية علشان تتعلم فوقعت في غرام الشاب الظريف.

الفكرة في المسلسل حلوة وهي وجهة نظر المطلقات عن نفسها، يعني الموضوع من وجهة نظر نسائية ومن وجهة نظر المجتمع، لكن المسلسل شخصياته قليلة وحواره كبير وأماكن تصويره قليلة والدنيا عمالة تدور حول فكرة واحدة وكلام بـ يتكرر في الحوار وكأن مافيش جديد وكمان الأحداث نفسها مش بـ تتطور بسرعة، ودي من السلبيات اللي بـ نأخذها على المسلسل.

لكن من الناحية الاجتماعية لازم نقول أنه مهم جدًا وجاي في توقيته، علشان يعالج نظرة المجتمع لها ونطرة الست للست المطلقة حتى لو صاحبتها لأنها بـ تخاف على جوزها منها، ونظرة الأهل والجيران والأصدقاء في العمل.. وبعيد عن السامعين يا رب.

عجبك ؟ جرب

سلسال الدم (2) علىmbc  مصر.

نصيحة 360

مسلسل "المطلقات" بطولة مى كساب، علا غانم، ميريهان حسين، مى سليم.. تأليف أحمد صبحى، ومن إخراج محمد الرشيدى، يعرض من السبت إلى الأربعاء 8 مساءً على قناة Ten.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح